55.000 ghjòvani in Corsica da 15 à 30 anni anu drittu à a felicità ! Hè ciò ch’ellu dice u « Pattu pè a Ghjuventù » adupratu dui anni fà da l’Assemblea di Corsica, prisentatu da a cunsigliera esecutiva Lauda Guidicelli.
Frà i cartulari di ssa sessione di nuvembre 2020, u pianu d’azzione di ssu Pattu di a Ghjuventù hè statu torna un mumentu forte di a mandatura.
A Cullettività di Corsica vole prumove una pulìtica pè a ghjuventù. 205 azzioni, 86 millioni d’àuri : u scopu hè d’accumpagnà i ghjòvani da tutta a so scularità sin’à a so entrata in a vita prufessiunale è u so spannamentu in a sucetà.
L’avvene hè a nostra ghjuventù. Ghjè ella chì ferà a Corsica di dumane è chì a custruisce à tempu ch’ella si custruisce sè stessa. Educazione, furmazione, impiegu, mubilità, salute, alloghju, attività spurtive è culturale, ingagiamentu citatinu… u scopu hè di falla impatrunìscesi di u s’avvene. Per quessa, bisognu à esse à l’ascolta di i so bisogni è e so brame, accumpagnala, furmala. « U Pattu pè a Ghjuventù », adupratu à l’unanimità u 27 d’aprile di u 2018, cresce oghje da u so pianu d’azzioni scrittu cù i ghjòvani chì ci anu partecipatu. Ferma una reta d’infurmazioni è d’arnesi à u serviziu di a ghjuventù, à tempu tènica è uperaziunale da permètteli di mette in ballu i so prugetti. Fà d’ogni ghjòvanu un attore di u so destinu è di a so ìsula, custruisceli un sistema educativu perfurmente uguale per tutti, dalli un quadru da spannassi è esse felice in tutti i duminii, arricà u so ingagiamentu citatinu, a Cullettività di Corsica vole dinù infradunisce l’attori nant’à valori, scopi è ingagiamenti cumuni à u senu d’una « Càrtula di l’attori di a Ghjuventù ». I ghjòvani ci anu partecipatu da aprile 2019 à lugliu 2020 cù assise è attelli cullaburativi ch’anu mischiati 500 ghjòvani è cunsultati più di 2000 altri permettènduli di custruisce è scrive inseme ssu documentu adupratu ssu 6 di nuvembre 2020 da l’Assemblea di Corsica. Stalli à sente è dalli a parulla. Permètteli d’accede à l’infurmazione hè u primu passu. Pò l’altra scumessa hè a furmazione, a lotta contr’à a dizzinghera sculare è fà chì tutt’ognunu possi accede à u sistema educativu, aiutali dinù à fà e so scelte, migliurà l’urientazione aprendu i ghjòvani à e realità di u mercatu di u travagliu, cù i sistemi d’alternanza per un dettu, o migliurendu e lee trà mondu educativu è mondu prufessiunale. Occupassi dinù di tutti l’altri bisogni, da l’alloghju à l’impiecu, a mubilità, i passatempi, pudè curassi dinù chì a salute hè un veru penseru oghje pè a nostra ghjuventù. In fine di contru permètteli in tutti i duminii, di truvà a so piazza in a sucetà. Vale à dì arpacà tutte e nostre pulìtiche cù ssu penseru à prò di a ghjuventù, per un dettu ripensà i mezi di trasporti, aiutà i ghjòvani à ottene u so permessu di cundutta cù u dispusitivu Prima Strada, addattà u parcu di l’alloghji da ch’elli pòssinu truvà a so casa, finanzà strutture d’accolte è alberghi pè a ghjuventù, aiutà i ghjòvani di i paesi, eccèttera.
Infine, per furmà i citatini di dumane, ci tocca à incuragìsceli à ingaggiassi è à piglià e so rispunsabilità. Àpreli dinù à l’internaziunale, permètteli di partecipà à prugetti di cuuperazione per un dettu è impegnali per l’ambiente è u sviluppu durèvule, a lingua, a cultura, a stòria, u numèricu è a cumunicazione, a cuuperazione, eccèttera.
«A pulìtica deve tènesi vicina di a ghjuventù chì raprisenta a Corsica di dumane» dice Lauda Guidicelli. «Ci tocca à stalli à sente oghje ancu di più cù a crisa sanitaria. Per quessa chì u nostru pianu hè evolutivu. A pluralità di l’azzioni è i dispusitivi hè segnu di a nostra vuluntà d’inserìscella à tutti i livelli di a sucetà.»
Pròssimu appuntamentu : u 10 di dicembre pè a sèguita di l’Assise di a Ghjuventù. •