Quale l’averìa creduta sta longevità di l’emissione « Dite a vostra » ? Nata 20 anni fà nant’à l’onde di RCFM, puntata da Ghjuvan’Carlu Marsily, hà fattu più chè traccià un solcu, hà custruitu « una famiglia ». È sta famiglia « Dite a vostra » à prò di a lingua corsa hà un solu penseru, una sola ubligazione : parlà corsu !
È cusì l’anu acquistata tutta sta ghjente ghjunta da quasi tutte e pievi di Corsica, da fà sente a nostra lingua in tutte e so sunurità, tutte e so parulle, da fà capisce, chì a lingua hè di tutti. A dice è a ripeta Ghjuvan’Càrulu Marsily : « chì tutti ci capimu ! » da Cismonte à Pumonte : hè un scambiu pupulare è quessa pò, hè francamente una bella rièscita ! Esse ghjunti, cù u solu amore di a lingua, à fà aduprala di manera naturale, ci sò ghjunti, tutti inseme, quelli chì l’ammaestràvanu, è quelli chì l’anu fatta soia pian’pianinu, ancu puru strappendula un pocu à le volte, ùn ci hè male, un antru ripiglia, senza ghjudicassi, senza liticassi, senza diciulà nant’à i parlati è l’accenti ! Ma chì bella scumessa, o ghjente ! È chì più bella testimugnanza di l’esistenza d’un pòpulu vivu ?
L’ore cunsacrate nant’à l’onde sò diventate cù u tempu un appuntamentu aspettatu per mondu ghjente. Eppò si sò trovi ancu in presenziale, cù, tutti l’anni, un accolta trà amichi da sparte inseme buccunetti è bichjerini, tuttu diciulendu, cum’ella face l’emissione à u cutidianu, vale à dì : parlà, rimà, cantichjà, imparà, cuntrastà, tramandà, fà campà a lingua corsa !
Cumu serà stu successu ? Hè a forza, pensu, di « Dite a vostra » : permette à l’auditori ch’anu pigliatu l’abitùtine di ritruvassi tutti i ghjorni nant’à l’onde di RCFM, di riacquistà a so lingua, di falla cresce, di cresce incù ella, di sparghje sperienza, spressioni, parulle, fole, filastroche, puesìe, canzone, riflessioni, in scambii magnìfichi.
L’altra forza di ssu fenòmenu culturale, hè quella d’avè creatu un leame suciale ch’hà fattu ingrandà ugnunu. Vale à dì scambii umani, chjachjerate, scaccanate, cum’è in i tempi forse di e veghje nustrale, quand’ellu ùn ci era nè televisiò, nè smartfoni… ma dinù vuluntà d’andà più luntanu, d’incaminassi nant’à i chjassi di a nostra lingua. Certi fàcenu ancu e ricerche, è si scàmbianu è s’impàranu e spressioni, e so urìgine, cum’ella si dice a parulla quì, è cum’ella si dice cullandi. È chì vulerà dì què ? È forse a spiecazione hè quessa, eccèttera. È si cuntrasta ancu in i chjami è rispondi postu chì quellu chì chjama dopu, risponde, cù strofe è malizia à a sfida ch’hè stata lampata…
In u frà tempu, cù u sustegnu acutu di Ghjuvan’Ghjaseppu Franchi, Ghjuvan’Càrulu nota, amenta, lampa e chjame, và à l’incontru dinù pigliendu a so vittura à traversu a Corsica.
Sta famigliona sparte u piacè è l’amicizia, ma dinù campa i so doli, chì certi dapoi, si ne sò andati. Puru fèrmanu in core à tutti, è sò mintuati ogni tantu, cum’è s’elli veghjàvanu sempre, mandendu un salutu da quassù…
Fà di sta lingua una lea trà tutti, un arnese, un strumentu di l’ànima di ssu pòpulu, hè u scopu u più arditu è strasurdinariu ch’ella hà riesciuta st’emissione.
Ùn ci hè parulle per dì quant’ella hà purtatu à ssa lotta pè u riacquistu di a nostra identità. À tutti, animatori, auditori, pueta impruvisati o nò, Arritti manda un ringraziu tamantu ! Sò u più bellu testimone d’un pòpulu ch’ùn hè ancu prontu à more, è d’una lingua viva !
« Dite a vostra » hè tutti i ghjorni à 2 ore dopu meziornu nant’à l’onde di RCFM. State à sente, eppò… voi dinù chjamate ! •
Anu dettu
« L’idea era di creà un spaziu in lingua corsa pè a ghjente diciendu “mirate, pocu imprema u vostru livellu di lingua, partecipate, ùn simu micca quì per ghjudicà, ùn hè micca una cumpetizione, ma, ci vole à fà un sforzu hè di parlà corsu.” » Ghjuvan’Càrulu Marsily
« Ciò chì mi piace hè di trasmette, a tramandera per mè ghjè a prima di e cose. » Ghjiseppu Vincensini
« St’emissione per noi, per mè, ghjè a pena a nostra figliola, a nostra criatura, ch’avemu pigliatu in manu, ch’avemu imbuccatu, cù tante spressioni, pruverbii, cù e canzone, cù e nanne… Simu una famiglia, quand’unu ùn chjama micca, tandu ci impenserimu, chì si passa ? » Amatu Leoni
« Quandu stavu in Cuntinente, ghjera l’emissione chì mi permettìa di sente u corsu, di sente tutti i parlati. Pigliavu una decina di parulle à u ghjornu, fecìa 50 parulle a settimana, è cusì pianu pianu, aghju pussutu imparà u corsu tuttu essendu nant’à u Cuntinente chì quallà ùn ci era micca Corsi per parlà. È dunque l’emissione m’hà aiutatu assai assai… Simu in amicizia, a lingua ùn s’impara micca solu cù i libri, ci hè a lea cù a ghjente. » Ghjuvan’Lucca Luciani.
« A ghjente credìa chì “oh u sartinesi ùn parla micca cum’è noi, oh u capicursinu hè un antra lingua, è ùn ci capiscemu nunda”. È in fatti, ind’è st’emissione ci avvedimu chì ugnunu si capisce. Hè una scuperta. Hè vinuta cusì à fil’di l’anni sta scuperta chì in fatti u corsu hè una lingua ùnica, cù pìccule variazioni ch’anu e so lee anch’elle. » Ghjuvan’Ghjaseppu Franchi.
