Donne Surelle hè un associu feministu di difesa è fraiutu trà e donne. U so scopu hè d’adunisce donne ingagiate da pudè creà retali influenti à prò di e donne è di i so bisogni di pettu à un mondu maschile, è ancu misoginu.
Donne Surelle unisce è adunisce donne impegnate in sfarenti dumìnii, a pulìtica, l’educazione, a furmazione, l’inserzione, l’imprese, l’agricultura, u sport, u mondu assuciativu o torna citatine o mamme di famiglia da prumove a donna è e so azzioni. Mette in ballu scontri è scambii di sulidarità, franchèndusi di i tràmpali di a sucietà o di l’upinioni pulìtiche : a lea hè a difesa di i diritti è di l’interessi di e donne.
Dice a so pàgina Facebook, « st’associu hà cum’è scopu d’adunisce nant’à u solcu di a sururietà e donne ingagiate di Corsica, da creà un retale di fraiutu feminile in dumìnii di cumpetenze multìpule ».
L’associu lotta pè a parità trà omi è donne, dinunzia tutte e viulenze è fastìdiu fattu à e donne. Lotta contr’à u maccìsimu, accumpagna e donne in situazione di debbulezza di pettu à omi viulenti è sprezzanti : « avemu cù noi cumpetenze di prufessiunali à a vostra dispusizione da favvi vince contr’à stu gèneru di prufilu. Ricunnòscelu, sapè analizà ciò chè vo campate hè u primu passu indispensèvule da pudè scappali è fallu fiascà ».
Cusì face campagna di prevenzione contr’à e viulenze, per luttà contr’à i fakenews è i rìsichi nant’à e rete suciale, per sensibilizà dinù i zitelli in e scole. Mette in valore prugetti artìstichi, attelli per luttà contr’à a sulitùtine di e personi anziane, o per cunvince à a nò-viulenza. Hà partenariati cù parechji associ, per un dettu l’associu Savannah, natu da u martòriu di Savannah Torrenti assassinata in 2016 à l’età di 23 anni. Hè membru di u Cullettivu Cari contr’à u razzìsimu stituziunale. « Assai cose ponu avvanzà più in fùria cù a sulidarità è a messa in rilazione di e personi cumpetente. Ci sò assai associ in Corsica chì s’impègnanu di manera spiccata. Donne Surelle permette d’adunisce i so dirigenti da pudè mubilizà e so cumpetenze pròpie : cultura, suciale, cumunicazione, insignamentu eccèttera » dice a so presidente, Laetizia Maroccu.
Donne Surelle aiuta e donne à esse indipendente, accumpagnèndule pè a so inserzione prufessiunale, a ricerca d’impiecu, a creazione d’impresa, a presa in càrica psicològica di pettu à e difficultà, a pràtica d’un sport d’autodifesa. L’accumpagna torna per dà di pettu à a malatìa, per truvà un alloghju, o una piazza in ciucciaghja pè i so figlioli. E sustene di manera finanziaria s’ellu ci hè bisognu. Cù l’aiutu d’imprese corse cum’ u gruppu Codim, hà creatu un fondu d’urgenza in 2021 per risponde à sfarenti prublemi.
Dice torna a so pàgina Facebook. « I valori di fraiutu è di spartera sò in core di a nostra azzione è a forza di u nostru retale face sorge prugetti nuvatori ».
Torna un bellu impegnu di sulidarità è d’azzione pusitiva ! •
Infurmazione è cuntattu : https://toccaanoi.com/acteur/donne-e-surelle/
Facebook : donne.surelle
X (twitter) : DSurelle
