Philippe Hamelle hè scultore, stallatu in a cumuna di Soriu ind’è l’Altu Nebbiu. Da vede u bustu di Marianne ind’è e merrìe, li hè ghjunta l’edea 6 anni fà di creà una Marianne pè a Corsica dinù. È chì sìmbulu più bellu è più famosu chì a testa mora ? « Mi sò messu à sculpì stu sìmbulu forte, sìmbulu d’una nazione, circhendu di falla di manera cunsensuale, à u più vicine di e spressioni ch’esìstenu digià, da ch’ella sìa accettata da tutti » spieca u creatore di st’òpera magnìfica ch’esiste in stuccu biancu, di rasgina, di bronzu, è sò, di fatti, bellìssime raprisentazione pè e stituzioni, l’amministrazioni, l’imprese, o puru per tene in casa soia ! Di 20 centimetri per mette nant’à u vostru scagnu, o di 50 centìmetri pè i bastimenti pùblichi, o puru in midaglione o in purtachjave, o puru torna più grande, basta à passà a cumanda !
St’anzianu designer hà vulsutu rende un umagiu à a terra chì l’accoglie è dà cusì à stu marcatore d’identità ch’hè a testa mora, una raprisentazione sculpita cuncreta, cù una spressione di u visu, quasi viva, chì pare girata serena versu l’avvene cum’ella pò esse a testa mora di e nostre bandere. A pudete custatà à Vision Futura ind’è u centru d’oftalmologìa Simoni in Bastia induve una sculture di bronzu hè sposta.
Philippe Hamelle spera cusì chì e cumune corse, cum’è quella di u paese di Soriu, adupreranu stu bustu di a testa mora, da fanne un usu pè i bastimenti ufficiali, cum’ellu pò esse u bustu di Marianne pè a Repùblica francese. Ci vulìa à pensalla. Hè fatta ! È voi o sgiò merre chì site numarosi à leghje Arritti, v’invitemu à visità l’attellu di ssu scultore o à cuntattalu da passà cumanda ! •