Femu Quì Ventures hè una sucietà di gestione di portafogliu nativa di Corsica chì adunisce 4.600 investiscitori, risparmienti, imprese, istituzioni private è pùbliche. Cù sette fondi attivi, investisce à latu à l’impresari corsi chì pòrtanu prugetti di creazione, di sviluppu, di trasmissione, è d’apertura à l’internaziunale. Femu Quì Ventures hè esciuta da Femu Quì S.A, sucietà di capitale-investiscimentu creata in u 1992 cù 1.200 azziunari pìcculi purtatori. Inseme, anu un stòricu di gestione di più di 30 anni è pòrtanu un ambiziosu prugettu di sviluppu. Da l’origine, 120 persone anu participatu à a guvernenza di Femu Quì, sbuccatu 90 operazioni è cuntribuitu à a creazione di più di 1.000 impieghi è 150M€ di creazione di valori. U 13 di lugliu scorsu, Femu Quì Ventures hà annunziatu u lanciamentu di Travalcà, un fondu prufeziunale di capitale-investiscimentu (FPCI) dedicatu à e pìccule è mèdie imprese (PME) corse. Eccu u cumunicatu di Femu Quì Ventures.
Arritti hè fieru d’avè cuntribuitu 30 anni fà à a creazione di Femu Quì. Cuntinuemu à sperà in st’arnese impurtante per l’ecunumìa di a Corsica è un sviluppu durèvule à prò di u pòpulu corsu.
« Annunzia Femu Quì Ventures u lanciamentu di Travalcà, un fondu prufeziunale di capitale-investiscimentu (FPCI) dedicatu à e piccule è medie imprese (PME) corse. In lu solcu di i 30 anni d’investiscimentu di Femu Quì, stu fondu hè una nova tappa maiò. Prupone una opportunità senza paru à l’impresari chì crèanu è svilùppanu imprese spurtatrice è cumpetitive à parte si di a Corsica.
Chì face Travalcà ?
Hè stata definita a taglia di u fondu per risponde à i bisogni di u mercatu, cusì pò intervene fin’à 2,5 millioni d’èuri per impresa, dopu à una selezzione rigurosa. Si doppia l’investicimentu d’un accumpagnamentu attivu cù u scopu d’aiutà a messa in òpera di a strategìa di l’imprese, in l’isula ma ancu fora. U fondu intervenerà in li principali settori di l’ecunumìa isulana è offre una leva d’investiscimentu chì pò ghjunghje fin’à 100 millioni d’euri à prò di e PME.
À quale s’addirizza Travalcà ?
Principalmente à piccule e mèdie imprese (è ancu, per eccezzione, à e TPE o l’ETI) chì anu base sode, da chì una apertura di u capitale permetterìa d’accellerà u sviluppu. Pò intervene in imprese chì fàcenu pettu à difficultà cunghjunturale, in fase di rilanciu. Una quindecina d’imprese saranu accumpagnate durante i dece anni à vene. Cù issi mezi finanziari è d’accumpagnamentu, s’ingaggia Femu Quì Ventures à prò di a crèscita è a resilienza di l’imprese corse, stimulendu l’ecunumia regiunale.
E caratterìstiche strafinanziarie
Si scrìvenu l’intervenzioni di Travalcà in a cuntinuità di l’azzione stòrica di Femu Quì è cusì favurisceranu a creazione d’impieghi qualificati, a vularisazione di risorse paisane è a prutezzione di l’ambiu. Saranu puru incuragiti l’interessu ecunòmicu, u sviluppu di i sapè fà, l’aduzzione di sistemi bassu carbone di pruduzzione è a responsabilità sucietale di l’imprese. U Fondu hè classificatu articulu 8 di u regulamentu SFDR (UE).
L’investiscitori
Travalcà hè un fondu à magiurità privata chì s’addirizza à l’investiscitori avertiti. Addunisce à u primu giru guasi 20 millioni d’èuri. Intornu à Femu Quì S.A, u fondu reunisce, da u latu pùblicu, Bpifrance via u Fonds de Fonds France Relance État-Région (FFRER) – chì si scrive in u quadru di u pianu di rilanciu « Facilité pour la Reprise et la Résilience » è benefiziendu di pianu di rilanciu europeu #NextGenerationEu – è a Cullettività di Corsica. Da u latu privatu, ci sò l’istituzioni finanziarie mutualiste chì anu u so sede o un impiantu in Corsica. Crédit Agricole de la Corse hà ghjucatu un rollu maiò inseme cù a Mutuelle de la Corse ; c’hè dinù Banque Populaire Méditerranée è Caisse d’Épargne CEPAC.
Apre avà FemuQuì Ventures a suscrizzione à d’altri investiscitori avertiti di manera à cresce u so impattu nant’à u sviluppu di l’imprese corse. A taglia aspettata hè di 25 millioni d’èuri è a taglia massimale di 30 millioni d’euri. » •
Anu dettu
« Pensu chè n’avemu creatu una dinàmica ingiru à u prugettu Travalcà è chì ghjè impurtente per Femu Quì bella sicura, ma sopr’à tuttu, cù ciò ch’hà da vene, pensu chì stu fondu averà un impattu maiò nant’à a Corsica. » Sébastien Simoni, presidente di u Cunsigliu d’amministrazione di Femu Quì S.A.
« Simu ricunniscenti di l’investiscitori chì anu piazzatu a so cunfidenza in a nostra squadra attraversu stu prugettu. Sprimu persunalmente tutta a mo gratitùdine ver di quelle è quelli chì custruìscenu sta piattaforma d’investiscimentu arradicata in Corsica. Speru chì i funditori di Femu Quì è i Corsi ne sò fieri. Ci rallegremu di cuncretizà frà pocu i primi investiscimenti. » Ghjuvan’Carlu Simeoni, direttore generale di Femu Quì Ventures.