Stu 26 d’aprile, serà a trista cummemurazione di a catastrofa di Cernobile, a più tremenda di a stòria di l’indùstria nuclearia. Fukushima vene dopu chì ghjè u terramotu è sopratuttu u tsunamì ch’anu fattu un veru scempiu è pruvucatu dopu l’insicurezza nuclearia. È ùn hè ancu compia ! Face 38 anni chì u core di u reattore nùmaru quatru di a centrale di Cernobile hà splusatu è s’hè mutu in un magmà radiuattivu chì, ancu puru chjosu in una doppia arca di piombu è d’astracu, ferma periculosu assai. In Ucràinia è in Bielorussìa, l’acqua, a tarra, a natura sò cuntaminate nant’à decine di millaie di chilòmetri quatrati. E pupulazioni cuntinuèghjanu è cuntinueranu à manghjà legumi, frutti, carna, latte, è prudutti naturali cuntaminati. Culandi, 80 % di i zitelli sòffrenu di una malatìa per vìa di sta cuntaminazione.
Eppuru, in Francia, u Statu rilancia u so prugramma nucleariu, civile è militare, mantene i reattori attuali, nè lancia d’altri, è u prugettu di fusione trà l’Agenzia di Securità Nuclearia (ASN) cù l’Istitutu di Radiuprutezzione è di Securità Nuclearia (IRSN) impeghjurisce torna sta puliticaccia. Secondu à l’associu indipendente Osservatoriu di u Nucleariu, si face cù sta fusione « un saltu in daretu di quasi 40 anni da u puntu di vista di l’infurmazione ».
Cù a scusa di u riscaldimentu climàticu è a necessità di riduce a cunsummazione di l’energìe fussile, d’un latu, è quella di a guerra in Ucràinia chì ciambotta a distribuzione in energìa in u mondu, d’un antru latu, u nucleariu addebbulitu dopu à Fukushima, ripiglia fiatu. Puru si sà ch’ellu hè una falsa suluzione pè u climà.
U guvernu lancia a custruzzione di sei EPR2 d’una putenza ugnunu di 1652 megawatt, allora chì EDF ùn hè mai ghjunta à apre l’EPR1 di Flamanville pè u quale a custruzzione dura dapoi 17 anni ! Cupèrchjulu è fundale micca cunformi, accusi di falsificazione, fattura sei volta più impurtante chè prevista secondu à a Corte di i Conti… eccu u bilanciu di l’EPR senza mai viaghjà ! A Francia vole dinù lancià una filiera detta Small Modular Reactor, chì multiplicheranu i siti nuclearii è cù elli i rìsichi d’accidenti. E centrale attuale sò prulungate sapendu bè a currusione, e fùghjite è l’accidenti putenziali, uni pochi ci sò stati digià. Vale à dì dinù un costu in più pè u cuntrollu è e revisioni evaluatu à 100 milliardi d’àuri secondu à a Corte di i Conti. Eppò ci hè u prugettu di Bure per mette sottu tarra à 500 metri di prufundezza i lozzi radiuattivi per centinaie di millaie d’annate (prugettu CIGEO).
In quantu à a rilancia militare, l’armata brama d’utilizà a centrale di Civaux per fabricà u tritium irradiendu u lithium, alerta l’Osservatoriu di u nucleariu…
U 6 d’aostu 2023, 150 cullettivi lucali di lotta contr’à u nucleariu si sò aduniti cum’è 50 anni fà à u Larzac, per ricustituisce a Cuurdinazione contr’à u nucleariu.
À a chjama di sta Cuurdinazione, ci seranu parechje adunite u 26 d’aprile per dinunzià a pulìtica scimatulita di u Statu francese pè u nucleariu. À u livellu guvernamentale, ùn ci hè più un palmu di nettu. Ùn ci ferma chè a lotta citatina per scumbatte contr’à l’accecamentu di i putenti di a pianetta. •