A Pace è a Salute sarà forse ciò ch’hè mancatu u più à a Corsica in a so stòria. N’hè diventatu un auguru chì tutt’ognunu sparghje à chì ne vole à parenti, amichi, vicini, culleghi di travagliu è ancu ghjente scunnisciuta, cumu per megliu dà di pettu forse à a gattiva sorte. Ssa brama di pace è di salute deve esse più chè mai un obbiettivu in un mondu in pienu cumbugliu. Puru, in Mediterràniu, per un dettu, una trentina di migranti anu francatu Natale è Capu d’Annu, ciambuttatu in mare dapoi trè settimane circhendu in vanu un portu da piantassi. Più di 512 millioni d’abitanti nant’à u vechju cuntinente, averanu a paura di 32 disgraziati ? Face 20 ghjorni ch’elli sò abandunati nè l’immensità di l’acqua dapoi chì u Sea-Watch 3, un battellu neerlandese affrettatu da un ONG allemana, l’hà succorsi u 22 di dicembre à u largu di a Libìa. Gattivu mare, freddu, scumodu da tutte e mamme, u battellu hà pussutu un tempu calassi à u largu di Malta, ma li hè statu difesu d’entre in portu. Trè zitelli chjuchi, unu, sei è sett’anni, sò malati da u mal’di mare, rèndenu, piènghjenu, trèmanu, sòffrenu di desidratazione è d’ipotermìa, cù trè zitelloni chì viàghjanu soli, quattru donne, è una manata d’omi. Sta ghjentarella dorme in terra, è pate di u freddu è u mancu d’igiene, ùn pò lavassi cum’ellu si deve, ùn hà micca intimità, colma d’angoscia, è aspetta. Nè Malta, nè l’Italia, nè a Francia, nè a Spagna, nisun paese meditteràneu ùn hà prupostu d’accòglieli in portu. À l’avvicinanza di Malta, pruviste li sò state purtate à tempu chì l’equipagiu hè statu cambiatu, ma per avà ùn sanu micca induv’elli puderanu andà. Hè una spècia di guerra d’usura ch’elli fàcenu i guverni aurupei, da chì l’associi chì pròvanu à occupassi da sta corcia ghjente, sìanu scuragiti è piàntinu i so succorsi. Vale à dì, omu deve lascià a ghjente annigassi… U Sea-Eye, affrittatu da un ONG allemana hè bluccatu anch’ellu à u larga di Malta dapoi u 29 di dicembre, cù 17 personi ch’aspèttanu di pudè sbarcà. Puru, cumu in Corsica di manera generale cù e pusizioni di i nostri presidenti, parechje cità in Auropa anu prupostu d’accoglie sta ghjente. Luigi de Magistris, u merre di Nàpoli, cumu una sfida à u guvernu di strema dritta di Matteo Salvini, s’hè prupostu anch’ellu. Ma Salvini hà chjosu tutti i porti taliani. « I ministri aurupei sò patetichi » hà dettu l’equipagiu di u Sea-Watch 3, chjamendu à u drittu d’accoltu internaziunale.
Associi umanitarii, ONG, chjàmanu à mette prucedure in ballu da chì i migranti ùn sìanu più ciambuttati aspettandu un aiutu. «A Corsica, in cunfurmità cù a so tradizione d’aiutu umanitariu, ferma dispunìbule da cuntribuisce à una suluzione aurupea » hà dettu u presidente di u Cunsigliu Esecutivu, Giliu Simeoni. A Lega di i Diritti di l’Omi hà dinù chjamatu u Statu francese hà mòvesi.
2.262 migranti sò morti en mare Mediterràniu in u 2017. È ùn si parla quì chè di i cadàveri ripescati.
Induv’hè a pace aurupea ?
Fabiana Giovannini.