L’aspèttanu dapoi anni è anni. L’associi di difesa di l’animali ponu esse cuntenti. Ci sarà un rifugiu in a regione bastiaccia ! In Furiani, più precisamente. U so merre, Michele Simonpietri, ùn hà mai piattatu u so interessu, è ancu u s’amore per l’animali. Cani è gatti sò i s’amichi. È face un pezzu anch’ellu ch’ellu riflette à mette in ballu a custruzzione d’un rifugiu per l’animali abbandunati. Ùn duverìamu micca parlanne, sò cose chì duverìanu esse nurmale è già in ballu dapoi un pezzu : e furiere sò ublicatorie per tutte e cumune chì anu a rispunsabilità di ricuperà l’animali senza prupietarii, ritruvà o truvali un maestru, o… disgraziosamente eutanasiali s’elli sò malati. Ma ss’ublicazioni ùn sò rispettate, furiere in Corsica ùn ci n’hè. Esìstenu rifugii assuciativi in grazia à a divuzione è a tenerezza per l’animali di l’associ di benevulenti, suvente ghjente cù pochi mezi chì i si pìglianu i casa, o l’affìdanu à famiglie chì l’accòglienu u tempu ch’elli tròvinu un maestru definitivu. Quand’elli sparìscenu ss’agrotti privati, hè un capatoghju tamantu u mondu pè e cumune è suvente l’affare si finisce cù tumbere per sbarazzassi di l’animali, pè u più i gatti… corci misgi ! Dapoi parechji anni, Michele Simonpietri travaglia à mette in ballu più chè una furiera, un veru agrottu mudernu, spaziosu, cù tutti i mezi per accoglie cum’è si deve ss’amicucci à quattru patte. A struttura di 5000 metri quadrati serà aperta da quì à dui anni. « U prugettu privede una furiera, ma preferiscu eiu parlà di sala d’attesa induve cani è gatti seranu accolti, curati è vaccinati da veterinarii chì seranu assuciati à u situ. Dopu à una settimana, l’animali seranu sposti in u rifugiu cù ugnunu un box cù un pìcculu terrenu aspettendu ch’elli sìanu adduttati » dice u siò merre.
U rifugiu hà da cuntene una centinaia di box pè i cani è un antra centinaia pè i gatti. Un parking, un scagnu d’accolta, una direttrice diplumata, un serviziu veterinariu, sanitarii, cucina, giardini, u locu hè addattatu è pare quasi un sonniu per l’associ chì l’anu aspettatu sin’à avà. E cose sò belle avvanzate postu chì l’architettu serà sceltu da quì à pocu è a custruzzione puderà principià à fin’di l’annu. L’inaugurazione si ferà à a fin’di u 2022 sè tuttu và bè. Michele Simonpietri vole fane un locu attrattivu di spassighjate, per dà a voglia à a ghjente di vene à vede l’animali è forse adduttali. A cumuna di Furiani prevede dinù un serviziu per catturà l’animali è truvali dopu una famiglia in grazia à u rifugiu. Bramemu ch’ellu darà voglia à tutte l’altre cumune di Corsica, da ch’ellu s’apri omancu in ogni rughjone lochi cum’è quessu.
Sciaccamanate à u merre di Furiani è u so cunsigliu municipale per appughjà ssu prugettu umanu ! •