Dritti calpighjati, lingua marturiata, pòpulu sprezzatu, prigiuneri cundannati à esse chjosi pè a vita, a Corsica hà sempre bisognu di rivolta. Ùn hè ancu compia a lotta. A pandemìa affoca è impedisce urganisazione è manifestazioni, u fattu d’esse à e rispunsabilità di a Cullettività di Corsica addurmenta e nostre brame di mòvesi è di strappà l’avvanzate cù e mubilisazioni in carrughju, ci hè sempre bisognu di stà arritti è di dinunzià ciò ch’ùn và micca !
U Statu ùn capisce chè a lotta di un pòpulu inzergatu. Ci tocca à cuntinuà à infurmassi, à scambià, à addunìscesi per dinunzià i malanni chì ci affànnanu, à urganizacci di manera cullettiva, à scumbatte è à agisce inseme di pettu à un guvernu chjosu è vindicativu. È l’azzioni ùn si ponu fà senza cumunicazioni da sparghje à tutti, da chì tutti sìanu cuscenti di e difficultà, di e pussibilità ch’avemu per cambià di versu è di u bisognu di riflette à l’indiature à piglià. Hè per quessa ch’ellu ci tocca à difende è prumove l’urdigni chè n’avemu. A settimana scorsa, avemu lampatu una chjama à sustene Arritti. A stampa scritta, ghjurnale o settimanale, ùn pò campà oghje senza u sustegnu di i so lettori. Mondu più quand’ella hè stampa d’opinione. E rete suciale chì spàrghjenu infurmazioni da tutte e mamme, a situazione ecunòmica è suciale, l’attache di l’amministrazioni di u Statu contr’à a stampa, tuttu què face ch’hè diffìciule oghje di mantene arritta a stampa in generale.
Amichi lettori, u vostru settimanale Arritti hè forte di i so abbunati, di i so sustegni publicitarii, di a forza di a so voce ch’hà purtatu è accumpagnatu tante è tante lotte dapoi 55 anni, ma costa caru di fallu stampà è di dà di pettu à tutte e custrinte amministrative è ghjurìdiche. Avemu bisognu di voi. Avemu bisognu chè vo cuntinuate u caminu cù ssu settimanale natu più d’un mezu sèculu fà, u più vechju ghjurnale di Corsica ! Cunfirmate u vostru abbunamentu, è sè vo ùn site ancu abbunati, pigliàtelu sùbitu avà ! Sè vo site digià abbunatu, abbunate ghjente, parenti o amichi, da ch’elli pòssinu anch’elli infurmassi, porghje sustegnu è fà chì ssu mughju lampatu 55 anni fà, cuntinuèghji à accumpagnà è strutturà e nostre lotte. Abbunati novi, sò ricette chì permèttenu di sparghje u nostru letturatu, d’allargà e nostre squadre, di fà cresce e nostre capacità di travagliu, di purtà a lettura d’Arritti in parechje altre case, è dunque, d’allargà u chjerchju di sta famigliona ch’hè stata frà e più cumbattente à longu à ssi 55 anni. Arritti hà apertu strade nove, suvente, in parechji duminii, ecunòmicu, suciale, ambientale, stituziunale, urganizatu cunferenze è dibàttiti da tutte e mamme cù persunalità di rinommu, hà creatu urdigni strutturenti cum’è Femu Quì, hà accumpagnatu chjame strutturante dinù cum’è in stu mumentu e virtù di l’insignamentu immersivu di l’associu Scola Corsa. Porta sopratuttu a rivendicazione d’autunumìa dapoi i so primi passi, scumbatte, argumenteghja, porghje sperienze impurtante, in Auropa o in altrò, da fà cresce sta voglia è e nostre capacità di strappala. Arritti hè indispensèvule à a lotta di u pòpulu corsu.
Aiutàtelu à campà. Mandate un sceccu di 55 àuri à : Arritti, 5 bd de Montera, 20200 Bastia. •
Fabiana Giovannini.
* Vede a pàgina 4 u biglietinu da rinvià.