Dapoi chì u mondu hè mondu, odiu è martoriu scrìvenu a so stòria. Più di 2000 anni dopu à Cristu, a barbaria ùn hà lacatu u core umanu. È a nostr èpica hè sempre crudele. A dice l’orrore in Sirìa è in parechji lochi di a pianetta.
Asad Shah, 40 anni, campava in Scozza, in Glasgow dapoi 20 anni. Avìa lasciatu u so paese, u Pakistan, per custruìscesi un avvene.
Musulmanu, fecìa parte di a cumunità minuritarie di l’ahmadì chì bràmanu a tulleranza religiosa è crèdenu anch’elli in u Cristu ch’elli dìcenu prufettu. Chjàmanu à una riforma di l’islam è dunque sò perseguitati da l’integristi. Asad ludava a so manera di pensà nant’à Facebook, chjamendu à l’amicizia trà e religioni è i pòpuli. Cumerciante in Glasgow era diventatu scuzzese è a si rivendicava cù a so pàgina Facebook à i culori di a Nazione scuzzese, induv’ellu avìa scrittu : « Benvenuti in Scozza » ! Dapoi qualchi tempu era inditatu da musulmani chì u trattàvanu di « falsu prufettu » è dinùnzianu l’ahmadì cum’è infideli è erètichi.
A cumunità di l’ahmadì hè stata fundata à u XIXu sèculu in Ìndia per rendre à l’islam a so purezza è piantà e guerre di religioni. Dìcenu vulè « l’amore per tutti è l’odiu per nimu ». U Pakistan hà interdettu u so cultu in u 1984 è uni pochi, cum’è Asad, si ne sò scappati à u Reamu Unitu. Sò 500 à èssesi stallati in Scozza induv’elli càmpanu bè. Asad mandava tutti l’anni à Pasqua o à Natale, messagi di pace è d’amicizia nant’à Facebook.
Ghjovi Santu, hà vulsutu lampà un antru messagiu à i s’amichi cristiani cattòlichi. « Bon vènari Santu è bone Pasque, sopratuttu à a mo nazione cristiana tant’amata. Seguitemu i veri passi di u Santu è tant’amatu Ghjesù Cristu per ottene veri successi in i dui mondi » avìa scrittu nant’à Facebook, cumu s’ellu s’appruntava à parte per l’altru mondu. Hè statu ammazzatu da parechje cultellate in u so cumerciu da un musulmanu chì ùn suppurtava i so messagi. Sopra piazza, fiori è luminelli onòrenu a so memoria da mondu Scuzzesi chì sò stati afflitti da ssa nutizia.
U ministru musulmanu di u guvernu scuzzese hà dinunziatu u settarìsimu chì « deve esse stirpatu in ogni locu ». A prima ministra naziunalista di Scozza hà partecipatu à a veghja murtuaria. Dicìa Martin Luther King : « u scuru ùn pò fà fughje u scuru, solu u lume pò. L’odiu ùn pò fà fughje l’odiu, solu l’amore pò ».
Puru, Asad hè mortu a settimana santa per vìa di a so religione chì li cumandava di tene caru à tutti. Per disgrazia, poche cose anu cambiatu dapoi à Cristu.
Fabiana Giovannini.