Una trentina di cumune in Brittagna, in u dipartimentu di e Côte d’Armor, anu presu un arrestatu di messa in ubligazione d’agisce contr’à u Statu da ch’ellu assicureghja l’offerta di curamentu… u più stunante ghjè ch’elli anu aspettatu sinamente à avà !
Face mesi è mesi, à le volte ancu annate chì certi territorii vèdenu e so urgenze saturate, e so maternità chjode un’appressu à l’altra, l’impussibilità di truvà specialisti, e difficultà ancu per truvà un duttore generalista, e case pè a ghjente anziana in difficultà, l’ubligazione di fà chilòmetri è chilòmetri per curassi… A ghjente ùn ne pò più di a mediocrità di a salute è i so eletti si vòltanu contr’à u Statu. L’àngulu d’attaccu ch’elli anu trovu dunque hè di mette in càusa u Statu per vìa di disturbu di l’òrdine pùblicu. « Ci n’hè una techja ! » dìcenu ssi merri. Belle-Isle-en-Terre, Le Meaux, Guingamp, Paimpol, Plouëc-du-Trieux, Treffrin, Callac, Lannion, Saint-Brieuc, Saint-Quay Perros, Plounévez-Moëdec, Loc-Envel, Kermaria-Sulard, Ploulec’h, Plouguiel, Troguery, Lanmodez, Plouha, La Roche-Jaudy, Pontrieux, Kerpert, Senven-Léhart, Louargat, Grâces, Plougonver, Pont-Melvez, Pédernec… vòlenu tutti un azzione di u Statu da trattali di manera degna è securizata. Face mesi ch’elli anu multiplicatu l’azzioni di cuntestazione, da i Cumitati di difesa di l’uspidale pùblicu, à e manifestazioni sindicale è pulìtiche, e mubilisazioni da tutte e mamme, i gruppi di travagliu, i scontri trà l’attori di a salute, e riflessioni, e chjame à più pudè… nimu ùn li risponde ! « Avemu decisu avà d’assignà u Statu per mèttelu di pettu à e so rispunsabilità » spiècanu l’eletti. « Hè ora ! E pupulazioni di i nostri territorii ùn anu più accessu di manera degna à a salute ind’è e nostre cumune, intercumunalità è territorii. S’agisce d’interpellà u Statu sempliciamente in tèrmine di salute pùblica è di dignità umana. »
L’uspidale pùblicu hè in gattivu statu in Francia. Un inchiesta d’Ipsos pè a Federazione uspitaliera di marzu 2024, dice chì 54 % di i Francesi scèglienu i servizii d’urgenze quand’elli anu un prublema per vìa ch’ellu ùn ci hè micca alternativa. In ssi servizzi saturati s’aspèttanu ore sane cù dulori in corpu o un ciucciu malatu à pienghje appiccolu. Peghju, più di sei francesi nant’à deci dìcenu avè rinunziatu à curassi sìa perchè era troppu longu d’avè un appuntamentu, sìa chì u duttore era troppu luntanu, sìa ch’elli ùn avìanu micca abbastanza soldi… Un francese nant’à dui, dice avè suffertu un ritardu di curamentu à l’uspidale per vìa di u persunale medicale troppu occupatu o di e so difficultà per ottene un appuntamentu. Un francese nant’à trè dice chì ssu ritardu hà avutu per ellu o i soi cunsequenze grave. Quattru malati crònichi nant’à deci dìcenu chì a so presa in càrica medicale s’hè ingattivita assai dapoi u Covid… eccèttera, eccèttera…
Di pettu à ss’assignazione, u Statu hè custrettu à risponde, l’eletti dumàndanu un pianu d’urgenza, è prevèdenu ancu un amenda di 1000 àuri per ghjornu di ritardu. « In Guingamp aspettemu a custruzzione d’un uspidale di pienu eserciziu, à Lannion aspettemu ch’elle àprenu urgenze 24 ore nant’à 24, in Saint-Brieuc dumandemu à mette in bone cundizioni i persunali medicali di pettu à i flussi di malati… Avemu presu e nostre rispunsabilità, à u Statu di piglià e soie ! » Chjìbba, saetta ! È perchè micca dumandà listessa cosa in Corsica per l’uspidale di Bastia, è i nostri paesi in mancanza di curamentu ? •