Imilitenti, simpatizenti è amichi di Femu a Corsica ùn ci si capìscenu un acca ! Dapoi 10 anni avà, e cumpunente di Femu a Corsica travàglianu inseme à scambià u destinu di a nostra ìsula è inventà lindumani più belli pè u nostru pòpulu.
Decine di millaie di ghjente ci anu raghjunti. E tappe francate inseme, e feste fatte inseme, e làcrime di gioie di u 2015, pò quelle di u 2017, i surisi è e scaccanate, e sciaccamanate è l’evvive… nunda ùn era fintu. A sincerità è e brame d’avvene èranu spartute da tutti. Anu datu nàscita à un immensa attesa di a ghjente bramosa di participà à sta magnìfica avventura, per custruìscesi u caminu di manera cullettiva. È tutti èramu d’accunsentu per francà ssa tappa nova indispensèvule per vìa d’un evidenza : ùn hè più pussìbule à capu à l’istituzioni di a Corsica di pudè travaglià senza una lea di terrenu efficace è sodda. Femu a Corsica, sìgulu d’elezzioni, hà campatu. Ùn ci appartene più. Femu hè oghje a prupietà di e millaie di Corsi ch’aspèttanu.
Hè cusì ch’avemu presu a trincata di u 29 di lugliu 2017 à a chjama di Gilles Simeoni… dopu à une pochi di sturzulimi cullettivi, mà l’avemu pigliata. Di pettu à centinaie di ghjente mubilizate in qualchi ghjornu, i capifili di Femu a Corsica l’anu detta : « ùn ci si pò esse vultata in daretu ». Hè stata tandu inficcata in ogni mente u partitu di guvernu! Un gruppu di travagliu hè statu messu in piazza, cù trè membri di ogni partiti fundatori è ghjente ghjunte d’altrò. Anu messu in ballu attelli di travagliu è fattu una chjama larga à scrìvesi. Sò centinaie i Corsi à avè rispostu. Cuntribuzioni, riunioni, dibàttiti da tutte e mamme anu datu nàscita à pruposte nant’à i Fundimenti di u novu partitu, a so andatura èttica è i so statuti. U 15 d’ottobre, forti da ssu travagliu cumunu è demucràticu, 1500 parsoni si sò adunite in Corti sott’à un tendone intusiastu. Dibàttiti, discorsi sulenni, è votu unanimu : anu creatu u partitu Femu a Corsica ! A decisione hè stata presa di dassi una Cuurdinazione pruvisoria di 30 membri : 20 pè e cumpunente anziane è 10 per l’altri militenti ch’ùn appartenìanu à nisun struttura. U scopu era, sùbitu dopu à l’elezzione territuriale, d’urganizà un assemblea generale nanzu à ghjugnu 2018, in càrica di dacci rispunsèvuli secondu à i statuti aduprati da i militenti u 15 d’ottobre. Era mezu cusì di dassi u tempu di e candidature è di e campagne d’ugnunu in e regioni per fà valè i so obbiettivi è e so pruposte. Invece, ssa Cuurdinazione ùn hè stata efficace per vìa ch’ella hà funziunatu cum’è i partiti anziani secondu à i so interessi è micca secondu à a vuluntà di i militenti di Femu a Corsica.
Appuntamenti fiascati, andature loscie, resistenza, gattiva vuluntà, o ciò ch’omu chjama « crisa esistenziale »… pocu imprema e rispunsabilità ! U fattu ghjè ch’ella ùn hà micca urganizatu cum’ella era u so scopu l’assemblea generale aspettata.
Face chì u partitu Femu a Corsica, puru creatu, hè in panna ! È sò sempre e cumpunente anziane, allora ch’elle s’èranu ingaggiate à smarisce, chì sò à capu di u famosu sìgulu. Cumu regulà stu capatoghju di manera demucràtica, vale à dì rispittendu u votu unanimu di e 1500 personi scritte à u partitu ? Pudete diciulà quant’ella vi pare, ùn ferma chè una suluzione valèvule : fà chjama torna à i 1500 militenti. Ci vole à adunìsceli cù l’assestu di dassi i rispunsèvuli chì ci màncanu.
Chere e candidature è sbuccà infine nant’à a risuluzione di ssu capatoghju. U restu ùn sò chè diciulimi di partiti ch’ùn vòlenu smarisce. Avà basta a cumedia.
Fabiana Giovannini.