A sucetà loda cù ragiò omi è donne impegnati pè u prò di l’altri. Si parla suvente, spessu in ssi tempi di suleoni, di i spendifochi. Merìtanu a nostra ammirazione. Certi mòrenu cusì giòvani per salvà ghjente è parà l’imprudenza o a scimità di l’altri. Affròntanu fragelli tremendi, cum’è in stu mumentu in Grècia. I mèdichi, i pulizzeri, ben ch’elli sìanu scredidatti da certi frà elli pèssimi è perversi, i spazzini, troppu scurdati, l’insignanti, impiegati à u più preziosu di e nostre sucetà : l’avvene di i zitelli, è tant’altri danu à a sucetà impegnu è curagiu cutidianu cù mistieri diffìciuli, pigliendu rìsicu à le volte è travagliendu cù tamanta generosità. Ma ùn ci hè più grande generosità chì quella di a lotta benevulente. Hè purtata da cunvinzioni è custati tremendi d’una situazione gattiva è inghjusta, è d’una brama di cambiamentu ch’elli soli suvente chjàmanu, cume pè u clima. Hè aspru è diffìciule u s’impegnu. Dà tempu, sudore, soldi, salute è sforzi cutidiani per fà avvanzà a sucetà, di manera disinteressata… merìtanu cunsiderazione è ringraziamenti, nò ? Di sicuru, ponu à le volte sbagliassi nant’à i so ragiunamenti ma s’impègnanu di manera demucràtica, vale à dì ch’elli rispèttanu u dibàttitu è l’inghjochi sò cusì sèrii ch’elli fàcenu attenti à ùn snaturà a so lotta. Onore ci n’hè pocu, s’ellu ùn hè quellu di vede avvanzà l’edee. Operèghjanu ind’è l’indiferenza, u più suvente, è ùn manca u travagliu acciacchente, l’addisperu, u dùbbitu. Sò maltrattati perch’è ùn càppianu nunda quand’elli vòlenu fà ricunnosce inghjustizie è furdanerìa. Sò inghjuliati. Certi sò ancu minacciati. È ponu more, assassinati per vìa di u s’impegnu. Frà sti benevulenti, quelli chì operèghjanu pè a difesa di l’ambiente sò di più in più perseguitati. 1733 difensori di l’ambiente sò stati tombi in u mondu trà 2012 è 2021, secondu à u raportu di Global Witness. Vale à dì trè assassinii ogni settimana. È ùn sò chì quelli ricensati ! In 2021, 200 eculugisti sò morti pè a difesa di u clima, di a biodiversità, di e terre sfruttate. Èranu 227 in 2020. Nant’à sti 1733 assassinii, solu 0,9 % sò stati risuluti. Tichjati di colpi, turturati à le volte, tumbati da tagliunaghji, gruppi criminali, o ancu forze di pulizza…. sò industriali è interessi finanziarii a raggione di sti crìmini. Sempre. Vale à dì interessu privatu contr’à l’interessu cullettivu. I paesi i più criminali sò u Brasiliu (342 crìmini), a Culumbìa (322), e Filippine (270), u Messicu (154), l’Honduras (117). Ma a situazione di i difensori di l’ambiente s’ingattivisce dapertuttu. Ancu ind’è noi. A ripressione tremenda contr’à militenti chì manifestàvanu contr’à i megabacili in Francia, u sciuglimentu di u muvimentu eculugista I sullevi di a Terra* danu penseru. L’ONU alerta nant’à a ripressione in Francia. Ma in Allemania, in Inghilterra, in parechji paesi aurupei i militenti eculugisti sò di più in più criminalizati è e misure prese da i Stati per ammutulìsceli, di più in più ripressive. In Corsica, hè un fattu incuntestèvule di vede i difensori di l’ambiente scherniati è inghjuliati. Ricèvenu anch’elli minaccie è sò pocu è micca sustenuti da l’autorità pùbliche. Sò puru elli, bellu suvente, l’ùltimu rampale di pettu à a destruzzione di a biodiversità. Merìtanu a nostra stima è u nostru sustegnu. •
Fabiana Giovannini.
* Les soulèvements de la terre