U Chjamàvanu Big Floyd, a so statura impressiunava ma i soi testimugnèghjanu d’un brav’omu, generosu è prutettore. George Floyd hè mortu à l’età di 46 anni per un bigliettu di 20 dòllari ch’ellu avìa in stacca da cumprassi duie sigarette. A cumerciante suspettendu un falsu bigliettu hà chjamatu a pulizza… L’imàgine di a so arrestazione mòstranu ch’ellu ùn circava micca à fughje.
I pulizzeri l’anu viulentatu, chjinèndulu nant’à l’astracu, un dinochju nant’à u collu à longu quasi 10 minuti. E so ùltime parolle funu una chjama à u succorsu : «per piacè, per piacè, m’assuffocu ! » Cusì hà dettu à parechje volte à i so boie… ma i pulizzeri anu cuntinuatu à assuffucalu.
Big Floyd era u so cugnome per vìa di i so 2 metri, ma dinù un nome d’artistu. Si pruvava à u rap ind’un gruppu di hip hop. I ghjòvani u tenianu caru da a so vita un pocu ciambuttata è a so vuluntà di sorte di a miseria.
Avìa chitatu Houston per campà in Minneapolis è ricustruìscesi dopu à une sbatichezza chì li hà custatu qualchi annu di prigiò. À Minneapolis, dicìa vulè cambià di versu, avìa truvatu un travagliu d’agente di sicurità, è bramava d’occupassi di e so duie figliole. Quale fussi a so persunnalità, more sott’à a turtura pè un culore di pella, è l’edee false ch’elli si fàcenu certi pulizzeri nant’à i neri, hè un stumacheghju chì rivolta l’Amèrica. Azzuffi sò nati in parechje cità è a còllera ùn ghjunghje à calmassi. A videò di l’ùltime stonde di Big Floyd hà cummossu u mondu sanu. « Tuttu u mondu tenìa caru u mo fratellu » dìcenu Philonese è Bridgett Floyd « anu tombu u mo fratellu chì cherìa aiutu. Era un dolce geante, ùn fecìa male à nimu. »
U so boiu, Derek Chauvin, era cunnisciutu da i so culleghi è a so ierarchìa per malfatti sott’à i panni di u pulizzeru. 18 lagnanze sò state poste contr’à ellu, tutte classificate senza sèguita ghjudiziarie. Dopu à a morte d’un ghjuvanottu di 23 anni in 2011, era statu messu in vacanza furzata durante trè ghjorni. Trè omi sò stati tombi dinù in 2005 dopu à una corsa in vittura. È Derek avìa dinù tiratu è feritu un omu micca armatu in 2008. Un antru pulizzeru ch’era cù ellu, Tou Thao hà dinù avutu sei lagnanze per viulenze senza ghjustificazione.
U sistema ghjudiziariu americanu hè perversu, ingaggia omi razzisti, senza cultura nè umanità dènduli un sìntimu di putere nant’à a vita.
Sò decine di millaie à manifestà, chjinèndusi in terra, mani ind’è u spinu è mughjendi « ùn possu più rispirà, ùn possu più rispirà »… Artisti, spurtivi, star di u Basket, musicanti, pulìtichi, mamme di famiglia, ghjuventù, a rivolta hè generale sin’à frà i pulizzeri. Parechji si sò inghjinuchjati di pettu à i manifestanti, capu calatu, in umagiu à George Floyd, per chere pardonu. Amèrica di cuntrastu, trà l’uni assassini, è l’altri abbracciendu manifestenti neri per dì a so sulidarità….
«George dicìa ch’ellu vulìa tuccà u mondu» conta u s’amicu Jonathan Veal. Ghjè a so morte chì tocca u mondu. L’assassiniu di troppu in un Amèrica chì si sfonda è ch’abbisogna d’una rivuluzione demucràtica.
Fabiana Giovannini.