L’agricultura biològica, vale à dì l’agricultura paisana chì ricusa i pesticidii è altri prudutti chìmichi, pruduce cù sumente naturale è tratta l’animali cù rispettu, era scarsa è minacciata pocu anni fà. Oghje, hè l’avvene ! U settore hè in pienu sviluppu è crea millaie d’impiechi in Auropa, è ancu in Francia ! In quattru anni, trà 2012 è 2016, l’agricultura bio hà creatu 32.500 impiechi in Francia è conta oghje 118.000 impiechi, vale à dì 10,8% di l’impiecu agrìculu. Cù un saltu di 11% solu in 2016!
È ùn si còntanu quì chè l’impiechi diretti. 15.000 imprese travàglianu torna cù l’agricultori bio. Vale à dì cù a trasfurmazione, a distribuzione, l’impurtazioni è e spurtazioni, u cunsigliu, a furmazione, i cuntrolli… sò 40.320 impiechi di più da cuntà in a dinàmica ! A cunsumazione di u bio in Francia hè cresciuta di 21,7 % in 2015 è 2016. U marcatu in un annu hè passatu da 5,8 milliardi d’auri à 7 milliardi d’auri. Ghjè dì u putenziale di ssu settore ! A resturazione principia anch’ella à interessassi à u fenòmenu. Trà 2015 è 2016, u bio hè cresciuta di 10% (182 millioni d’auri). A ghjente n’anu una techja di manghjà n’importa chè. Vòlenu frutta, legumi, carne, latte è robba da manghjà gustosa è sapurita ! Vòlenu soprattutu firmà in bona salute, marcati è imprimuriti ch’elli sò da e crise sanitarie da tutte e mamme ch’ella si porta l’agricultura industriale. Face chì i pruduttori è i distributori càmbianu di versu anch’elli. Trà 2015 è 2016 sempre, a superficìa agrìcula cunsacrata à u bio hè cresciuta di 17,5 %. Raprisenta oghje 5,7% di a superficìa tutale agrìcula, vale à dì 1,5 millione d’èttari cultivati. Sò 32.264 e spluttazioni agrìcule bio in Francia. Di sicuru, ferma sempre una strada tamanta da fà, ma pocu à pocu u paisagiu agrìculu cambia. L’Agenza Bio prevede una crèscita torna di a superficìa bio di 20% trà 2017 è 2018. U guvernu ellu hà previstu un pianu di trasfurmazione agrìcula di 5 milliardi d’auri in cinque anni. Hè una prumessa presidenziale… sperendu ch’ella serà tenuta!
A dinàmica si face dinù ind’è l’associi è l’evenimenti à favore di ss’agricultura sane è virtuosa. Basta à fighjà e rete suciale. S’aiuta dinù ghjente di u lucale, agricultori chì càmpanu da a gioia è a passione di u so mistieru, è micca di l’albasgia è l’approdu.
« L’impieghi nati da a vitalità di e filiere bio cuntribuìscenu à u dinamìsimu di i territorii. In più di i benefizii per l’ambiente o per l’animali, pòrghjenu un valore aghjustatu impurtante in a vita ecunòmica è suciale. Cù una dinàmica chì si furnisce à più di 70% soprapiazza, vale à dì un cunsumatore chì compra bio, sustene l’impiecu lucale » dice l’Agenza Bio.
In Corsica, l’agricultura bio raprisenta 20% di a nostra agricultura, è più di 300 spluttazioni, è in piena crèscita dinù. U Padduc chere a messa in valore di 105.000 èttari di terre agrìcule, per creà impiechi, dinàmica ecunòmica, à prò di a nostra terra. Hè un settore priuritariu. Cumprate lucale, cumprate bio !
Fabiana Giovannini.