Accapu di a reddazzione

Bolsonarovirus

 A Francia è l’Auropa si pòrtanu megliu, ma in certi paesi u coronavirus hè in piena crèscita, mondu più chì e misure di distanziazione ùn sò micca rispettate.

À u Brasiliu, u presidente Bolsonaro hà una gestione catastrofica di a crisa. Rilativizeghja dapoi e prime alerte u perìculu, diciendu ch’ellu ùn hè ch’un a pìccula influenza, prova à impedisce u cunfinamentu, manda à caternu i so ministri è ghjùdici, ùn prutege micca a pupulazione, è pè u più a pupulazione di i favela induve a ghjente campa l’uni sopra l’altri, ind’una miseria nera. Incuragia i speculatori à impadrunìscesi di a furesta amazuniana, mettendu in perìculu l’indiani chì ci càmpanu in più di arruinali è d’arrubali e so terre.

Dopu à avè sistematicamente calatu i sciffri di u bilanciu datu ogni ghjornu da i scientìfichi, impedisce oghje a publicazione di ssi bilanci per ùn fà sapè a realità di i morti è di i cuntaminati à u Covid19. U più grande mèdia brasiliani, u Globo, parla di « crìmine » è hà decisu di publicali quantunque… Secondu u Ministeru di a Salute èranu u 7 di ghjugnu scorsu 685.427 cuntaminati per 37.312 morti. In fatti certi mèdichi è associi pàrlanu di millioni di personi cuntaminate. Dapoi qualchi ghjornu, u ministeru di a salute ùn dà più chè i morti cutidiani, malgratu chì u presidente di u Cungressu dumanda a publicazione di u veru bilanciu. Bolsonaro li hà rispostu seccu « ùn ci serà più sughjettu nant’à u bilanciu à u ghjurnale naziunale» ! L’autorità reghjunale di a salute dinùnzianu « una tentativa autoritaria, micca umana è cuntraria à l’ètica di rende invisìbili i morti di u coronavirus ». U Ghjùdice di a Corte Suprema Gilmar Mendes dinunzia anch’elllu « una manipulazione statìstica degne di i regimi tutalitarii ». Parlendu ancu di «#CensuraNao » (innò à a censura), è « #DitaduraNuncaMais » (mai più dittatura), Mendes dinunzia torna : « ssa minichera ùn pò piattà a rispunsabilità d’un pussìbule genocidiu ».

L’anzianu ministru di a salute, Enrique Mandetta, hà dettu ellu chì «da u puntu di vista di a salute, hè una tragèdia.

Ùn infurmà micca vale à dì chì u Statu hè più nucivu chì u virus ! »

Bolsonaro dice ch’ellu hè per prutege u paese di a crisa ecunòmica. In fatti, a so gestione pruvucheghja una crisa ecunòmica tremenda. U real hè a munetta a più tocca di i paesi in cor’di sviluppu. Hà persu più di 29% per raportu à u dòllaru. Secondu à i specialisti di e finanze u real hè diventatu una «munetta tòssica ».

A China chì sinamente avà cumprava quasi tutta a so pruduzzione agrìcula à u Brasiliu, cerca altri mezi di pruvista. È a crisa sanitaria è ecunòmica pruvucheghja una crisa pulìtica. 27 dumande in destituzione sò state poste à u Parlamentu contr’à Bolsonaro. Ma micca esaminate per avà… Ancu Trump abanduneghja u s’amicu. Dapoi u 25 di maghju, u presidente di i Stati Uniti hà chjosu e so fruntiere cù u Brasiliu, vistu da i Stati è e nazioni, cum’un rìsicu sanitariu mundiale.

 

Fabiana Giovannini.