À mezu à u cunflittu in Ucrainia, s’hè francatu u 36u anniversariu di a catastrofa di Cernobile. Quand’elli anu accampatu a centrala i suldati rùssii, l’Auropa s’hè presa di paura. Un tempu, l’AFP parlendu di a crèscita anurmale di a cuntaminazione, hà datu u spaventu à tutti, ancu assai, ghjera un sbagliu. Ma l’angoscia hè cresciuta in Zaporijia dinù, un antra centrala nuclearia ucrainiana ch’hà piantatu l’uperazioni di cuntrollu abituale cù l’occupazione rùssia, aumentendu, secondu l’autorità ucrainiane, mà dinù aurupeane, « u rìsicu d’accidente ». U 24 di ferraghju, i Rùssii avìanu presu a centrala di Cernobile sott’à e bombe. L’8 di marzu, l’Autorità Internaziunale di l’Energìa Atòmica fecìa sapè chì l’impiecati sinamente avà bluccati ind’è a centrala avìanu pussutu esse rimpiazzati è arripusassi. E rutazioni di i persunali sò indispensèvule per impedisce i sbaglii umani ind’è i prutucolli di cuntrollu. U 28 di marzu, l’AIEA torna s’impenseriva di a suspensione di e rutazioni, dinunziendu impiecati stanchi è tramannati da a situazione. Incèndii sò nati sott’à e bombe ind’è a zona di sclusione vicina à a centrala dendu torna assai penseru. Eppò si ne sò andati i Rùssii u 31 di marzu, dopu à avè custatatu cuntaminazioni frà i so suldati… L’AIEA hà dinunziatu u so cumpurtamentu « assai assai periculosu » durante l’occupazione di a centrala. U capi ingeniore di a centrala hà testimugnatu di « l’amatorìsimu, u mancu di qualificazione è u pocu di cunniscenza di l’occupanti rùssii ». Ramentemu chì u novu sarcofagiu chì deve prutege u mondu di a cuntaminazione di i reattori accidentati, hè statu compiu in 2019 è chì s’ellu venìa à spaccassi ùn sarebbe chè un pocu, a cuntaminazione sarebbe sùbitu impurtante. A manera ch’elli si sò sparsi i Rùssii hè stata « una minaccia gravìssima per l’Ucrainia ma dinù per l’Auropa » dìcenu l’Ucrainiani. L’Agenzia nuclearia ucrainiana hà custatatu una crèscita di a cuntaminazione di l’ambiente per vìa di i passi è veni di i camiò è i curazzati rùssii, ch’anu alzatu e pòlvere radiuattive ch’ellu ci hè in terra. U penseru hè natu torna per vìa di l’arrestu di l’alimentazione elèttrica l’8 è u 9 di marzu. L’autorità nuclearia ucrainiana Energatom s’hè presu di paura pè u cìcculu di rifritamentu di i cumbustìbili radiuattivi è dunque u rìsicu di cuntaminazione è e so cunsequenze per l’Ucrainia, ma dinù pè a Bielorussìa, a Russìa è l’Auropa. Puru, secondu à l’AIEA u livellu di ssa cuntaminazione hè statu cuntenutu. U penseru è i so fantàsimi anu fattu teme torna manipulazioni scimàtiche cù certi lozzi radiuattivi per fanne bombe cuntaminate. Ma secondu à l’AIEA ssu rìsicu dumandava una maestrìa di a tecnulugìa cumplicata è dunque ùn era sèriu. A paura a più sennata hè stata piuttostu l’incuscenza è a scunniscenza di i suldati rùssii manipulendu i sistemi di securità di a centrala. Oghje ssi rìsichi sò scartati postu ch’elli si ne sò andati i suldati rùssii ma u perìculu ci hè sempre per vìa di e bombe. A minaccia di tuccà u sarcufagiu esiste. Ùn avemu ancu compiu cù i malori è e suffrenze di Cernobile. Si vede quantu u nucleariu ùn hè un energìa sicura, ch’ellu sia in tempu di pace, o peghju, in tempu di guerra. •