L’elezzione presidenziale ùn hà ancu compiu di lasciaci amarezza è imputenza in gola… Certi à dìcenu à a so manera. Da i studienti di a Sorbonne in Parigi ch’occùpanu a so università mughjendu « nè Macron, nè Le Pen ! », à i militenti eculugisti d’Extension Rebellion ch’urganizèghjanu un siting maiò in u centru di Parigi per dì u so pinseru di pettu à i perìculi di l’Umanità, à tutte e viulenze aspre sprimate in carrughju o nant’à e rete suciale… cumu tutti l’inghjochi tamanti d’un elezzione cum’è quessa anu pussutu esse mandati à caternu da un primu giru pùzzicu chì laca un avvene senza sboccu per più di 60 % di l’elettori scritti ? In Corsica dinù omu hè addisperatu. Trà u giacubinìsimu stremu di u naziunalìsimu francese, un guvernu disprezzante ch’hà intrappulatu torna a Corsica in u cìculu murtiferu viulenza-ripressione, è a brama indebbulita di fassi sente cù neguziati da purtacci à una pussìbule autunumìa… cosa ferà u pòpulu corsu ssu 24 d’aprile ?
Pocu fà, Arritti rendìa contu d’un viaghju in Tindouf di u deputatu aurupeanu Francescu Alfonsi. Spiecava a crudele puvertà di ssu pòpulu sahraoui cacciatu di e so terre sin’à un disertu induv’elli ùn ponu campà malgratu u so curagiu è e so fede d’avvene, senza l’aiutu internaziunale. Ripensènduci dopu à u 10 d’aprile, mi dumandu… Cosa diventerà ssu pòpulu fieru è curagiosu cù una presidenza RN chì rimette in càusa di manera generale è inghjusta l’aiutu internaziunale à u sottusviluppu cù a so « priurità o priferenza naziunale » ? È dopu à dui mesi di l’invasione rùssia in Ucrainia è u so martòriu di pettu à a prima putenza nuclearia mundiale cù e so 6600 teste nuclearie, cosa diventerà ssu pòpulu di cumbattenti ? A Francia n’hè a terza putenza è dispone di 280 teste nuclearie, di chè quantunque strùghjesi millaie d’Hiroshima… cumu seranu utilizate ? Cumu serà rettu ssu cunflittu da Parigi, è dunque da l’Auropa, cù una presidenza chì pattighjeghja cù tutti i dittattori di a pianetta ? Cosa si ferà dinù di l’ambiente cù una Francia chì vole smantellà l’euliane è i parchi fottovoltaichi ? Ci scalderemu torna à u fiulu è u carbonu aspettendu a custruzzione di nove centrale nuclearie, o allora punteremu à fondu l’attuale centrale sin’à ch’ellu schiatta in qualchi locu un accidente ? Chjamà i sforzi ch’ellu ci tocca à fà per dà di pettu à u ciambuttamentu climàticu « eculugìa punitiva » hè irrispunsèvule. U tuttu-nucleariu energetticu di Macron ùn hè micca megliu ma cuscenza ci hè di puntà u sviluppu di l’energìe rinuvelèvule. Omu si cunsola cum’ellu pò… È pè a Corsica, cumu avemu da sòrteci cù un Statu chì quand’ellu parla di e nostre brame cummenta cù un… (a dicu spessu in francese, chì a nostra lingua ùn hà piazza quì) « l’autonomie est un leurre », « ne crée pas d’emplois et ne remplit pas les frigos » è chì riassume a so visione di e nostre rivendicazioni à un « problème de sécurité »… Di pettu à què, avemu à Macron, u so disprezzu è i so disciulimi… o pòveri à noi !
Ssu 24 d’aprile m’addispergu di vede u pòpulu corsu vutà u so cuntrariu udiosu u più stremu. Allora… chì femu ? •