Accapu di a reddazzione

Chili

Elisa Loncon Antileo, indigene di u pòpulu mapucciu, hè stata eletta u 4 di lugliu scorsu presidente di l’Assemblea incaricata di scrive a nova Custituzione di u Chili. Pinochet si deve girà ind’è a so fossa ! È cù ellu uni pochi d’altre tafiante di l’èpica di a dittattura di ssu paese marturiatu. Cum’è sempre, in Francia, si parla pocu di l’evenimenti chì fàcenu a storia di u mondu. Sò sicura ch’uni pochi di lettori di ssa rubrica ùn ne avìanu mancu intesu parlà… I Mapucci (pòpulu di a terra in a so lingua) sò amerindiani, primi abitenti di u Chili è di l’Argentina nanzu ch’elli s’affachèssinu l’invasori culuniali. Disprezzati, perseguitati, acculturati à longu à i sèculi, ùn fòrmanu più chè 4 o 5 % di u pòpulu chilianu. Discriminati ancu oghje, si capisce chì a numinazione à capu di l’assemblea custituante d’una di i soi hè un evenimentu stòricu ! St’assemblea hè stata decisa in un referendum d’ottobre 2020, dopu à manifestazioni maiò dapoi dui anni, per mette in ballu una riforma prufonda di a Custituzione in favore di i diritti suciale è di a lotta contr’à l’inegualità ecunòmiche. L’assemblea hà 9 mesi per cunduce ssu travaglione, chì puderà andà sin’à un annu. Un referendum serà urganizatu dopu per aduprà a nova custituzione. U vote serà ubligatoriu. Sò 155 i membri di ss’assemblea, frà i quali solu 17 mapucci, è a parità omu/donna ùn hè stata aduprata chè di maghju 2021. Ghjè dì quant’ella hè stòrica in vera l’elezzione d’una donna mapuccia à capu di ss’assemblea !

À a prima adunita di l’assemblea custituante, Elisa Loncon, 58 anni, hè ghjunta vestuta da i panni tradiziunali di a cultura mapuccia, tenendu una bandera di u so pòpulu. Hà parlatu bislinguu, in spagnolu, è in a so lingua materna mapuccia, u mapudungun. Salutendu tutti i pòpuli chì fòrmanu u Chili (ci sò parechji pòpuli amerindiani), Elisa Loncon hà dichjaratu sottu à e sciaccamanate di l’assemblea : « Sta custituante hà da trasfurmà u Chili in un Chili plurinaziunale, interculturale, ch’hà da prutege a Terra mamma ! » Hè una vera rivuluzione demucràtica pè u Chili. L’amerindiani, e so culture è e so lingue sò disprezzati. Di vede a bandera mapuccia schiaffità nant’à a tribuna di un istituzione ch’hà da aduprà a custituzione, ùn pare mancu vera ! S’appròntanu veri ciambuttamenti pulìtichi chì sò annunziati in e prime dichjarazione di st’universitaria linguista diventata una di e persone e più impurtante di u paese. Nanzu di principià u so discorsu, Elisa Loncon hà dumandatu un minutu di silenziu « pè i morti di i 500 anni » parlendu quì di l’invasione di i cunquistatori è di a storia marturiata di u paese dapoi st’èpica. S’hè ingagiata à prutege l’ambiente è i dritti di i pòpuli indigeni, frà i dritti di i pòpuli, cù vere misure suciale è i dritti di e donne. Dice di a so elezzione ch’ella hè « un sonniu spartutu da tutte e cummunità di u Chili in e so varietà, u sonniu di fà attenti à a Terra mamma, d’ottene dritti suciali è un drittu à l’acqua. »

Hè stata acclamata sott’à i mughji : « Viva el Chile real ! » Tamanta speranza pè i più pòveri ! 40 % di l’eletti ùn sò micca membri di un partitu tradiziunale, vale à dì l’andatura demucràtica spùtica di ssa dimarchja. U « veru Chili » dìcenu l’osservatori. Bramemu chì Elisa Loncon è ss’assemblea puderanu cunduce sin’à a fine u so travagliu per un Chili demucràticu è appaciatu. •

Fabiana Giovannini.