Sta crisa hè mundiale. Vale à dì ch’ellu ci tocca à luttà di manera mundiale. Fin’tantu ch’ellu firmerà in qualchì locu di a pianetta u mìnimu locu d’infezzione, serà un perìculu da ch’ella riparte l’epidemìa in u mondu sanu… A sulidarità deve urganizassi dapertuttu è omu ùn pò sminticassi i più pòveri, in i paesi i più pòveri. L’associu Médecins Sans Frontières chjama à u succorsu da pudè curà a ghjente in i campi di rifugiati. U campu di Deir Hassan in u nordu ueste di a Sirìa accoglie quasi 165.000 perseguitati da l’armata siriana. « E cundizioni di vite sò tremende » dice MSF chì teme a minaccia di a sparghjera di u coronavirus. Sta ghjentarella hè scappata da i bumbardamenti è a guerra, incaminèndusi in u freddu, zitelli pediscalzi suvente, impauriti, è fame in corpu. Stanchi, si sò piantati ind’è ssu campu induve MSF cerca à urganizà l’accolta. Certi ùn anu mancu un tendone per aggruttassi, d’altri sò ammansati l’uni sopra à l’altri, in u freddu è a miseria. MSF distribuisce à centinaie di personi, tendoni, strapunte, cuperture, prudutti da tutte e mamme è, ben intesa, di chè curassi, beie è manghjà. Ma sò millaie è millaie à chere aiutu… è ancu puru cù l’appoghju di mondu altri associi è urganìsimi umanitarii, MSF ùn pò dà capu à tuttu. « Ssu campu hè statu creatu 10 mesi fà, ma màncanu i cacatoghji o l’evacuazione di l’acque brutte ». Stu prublema hè un mezu di sparghje l’epidemìe, frà e quale e malatìe rispiratorie, ma dinù l’infezzioni da tutte e mamme. U 23 di marzu scorsu, a Sirìa hà arrigistratu u so primu casu (ufficiale) di Covid19. Vale à dì chì a malatìa hè già entruta in u paese è ch’ella pò spàrghjesi in furia, pè u più in i campi trapupulati induv’ellu hè impussìbule di rispettà e cunsigne di luntanenza, è induve esìstenu pocu è micca infrastrutture sanitarie. Ci vole à sparghje infurmazioni, lochi è materiali d’igiene, permette à a ghjente di rispettà u mìnimu di prutezzione. Ci vole à pudè spiccà i malati, è curali in bone cundizioni. Ci vole à risponde à l’altri bisogni, u freddu, a fame, l’altre malatìe. È ci vole à falla in u campu di Deir Hassan, cum’è ind’è tutti l’altri campi di rifugiati, in a regione d’Afrin, di Boulboul o d’altrò. « Dopu à 9 anni di guerra, chì farìate sè vo èrate parente in Sirìa ? » dumanda l’Unicef chì chjama anch’ella à l’aiutu umanitariu per sta corcia ghjente. Sò millioni à avè abandunnatu tuttu. S’elli ùn pròvanu à francà u mare, si piàntanu in i campi di rifugiati à e fruntiere turche o greche. Firmà in Sirìa ? Ghjè cundannassi à a morte.
I prezzi di i prudutti di prima necessità anu cresciutu di 20% cù 80% di a pupulazione chì campa sott’à u livellu di puvertà. Viulentati, feriti, affammiti, à le volte ancu imbrigadati per fà suldatu, i zitelli ùn anu nisun mezu di francàssila for’di e strade di l’esiliu. Aiutèmuli.
Fabiana Giovannini.
MSF : https://bit.ly/2YEaY4a
Unicef : https://don.unicef.fr/Syrie/