Dopu à esse statu indebulitu da i passi è vene di u linzolu rossu, feritu da tutte e parte da spade chì l’anu laceratu u spinu è aghjaditi i mùsculi, l’animale s’hè chjinatu, accagliendu sott’à i mughji di a ghjente, e rise è e sciaccamanate. Cosa penserà ssu colossu bavacciulendu di sangue à st’ùltime stonde di a so vita ?
L’omu acclamatu da u pùblicu, s’avvicineghja, a so cultella in manu. U torru hè ghjuntu agnellu, incapace di difèndesi, stancu mortu, i so ochji sbarragati ùn tradùcenu chè terrore, incredulità è suffrenze… d’una manu, l’omu chjappa a so corna, da l’altra alza u cultellu. A ghjente arrabiata hè colma d’eccitazione. A punta di u cultellu si piazza daretu à e corne, circhendu un caminu trà l’osse, l’omu ùn ghjunghje à piantalu. A vita s’ostina è resista. L’animale rispira sempre, mughja, soffre, u sangue schizza, ma nunda ùn face. L’omu prova à inturcinà u cultellu per fallu entre, a pella hè dura.
Cuntinueghja, pianta è ripianta, inturcinendu a cultella… l’ochji di a bestia sò sempre belli aperti è u so sguardu cerca à capisce. U corpu tremuleghja, trasalteghja, ma l’ochji fèrmanu aperti. Entre infine a cultella, una volta è po duie. Risorte ind’un rivoccu di sangue. È l’omu, senza core, asciuca a cultella nant’à u capu di l’animale, vicinu à ss’ochju chì u fieghja sempre. Cum’hè pussìbule una barbarìa sìmule ? A videò hà fattu u giru di e rete suciale, stumachendu millaie d’internoti. Artisti anu fattu sente a so voce per dì u so disgustu è chjamà à piantà a corrida. Hè un associu in Bilbao, AnimaNaturalis ch’hà fattu ssa videò per chjamà à piantà e corridà. « Per piacè Juan Mari Aburto (u merre di Bilbao), àppiite curagiu pulìticu è trasfurmate l’arena di Bilbao, ch’appartene à tutti i citatini, in un spaziu culturale. Ùn fate più soffre l’animali cù e suvvenzioni pùbliche ». Si dice ch’ella hè arte. Si parla di cultura landana. A lotta contr’à l’omu è l’animale hè una corsa spetàculu secondu à un rituale precisu. À l’iniziu, tuttu hè bellu, a festa, i culori è custumi spampillulenti di i matadori, a ghjente impaurita per elli di pettu à sse tunnellate di mùsculi è di rabbia… A corridà principia cù a sfilarata di tutti i matadori è piccadori. Pò trè scene si seguìtanu, chjamate terzi. U primu terzu, sò i piccadori à cavallu ch’affròntanu l’animale, circhendu à tuccalu cù picche longue. Più hè toccu, più perde sangue è s’addebulisce, menu hè periculosu dopu pè u matador.
U secondu terzu, sò e banderiglie piantate nant’à u spinu, u più vicinu pussìbule di a lisca. U neru diventa rossu infiaratu… Infine, ùltimu terzu, u matador dopu à avè faticatu torna l’animale u tomba cù a so spada. Quantu sò morti ind’è l’arena anch’elli ? À chì ghjove tutta sta suffrenza ? Dìtela voi dinù. Basta a corridà.
Fabiana Giovannini.
https://video.twimg.com/ext_tw_video/1045285412082778114/pu/vid/1280×720/g6GuidUdYTn6gxTs.mp4?tag=5