Umare ùn hè a sola fruntiera à tumbà l’omi... Ci cummòvenu e stòrie di a seconda guerra mundiale, nanzu à a Liberazione, induv’omi, chjamati eroi, piattàvanu ghjudei per salvali di e persecuzioni è a mustruosità di u nazìsimu. S’hè aiutatu dinù omi, donne, zitelli à francà e fruntiere à traversu à a muntagna. Assai sò morti disgraziosamente, u viaghju era longu è duru, ind’a neve è i perìculi da tutte e mamme… Oghje, d’altri omi, donne, zitelli, nant’à un battellacciu per francà u Mediterràniu, o à pedi franchendu l’Alpe, pròvanu à raghjunghje u so Eldorado. Assai mòrenu in u freddu, l’indiferenza è a paura. Chì vergogna pè e nostre demucrazìa! U Monde.fr ci conta u 7 di ghjugnu scorsu chì a neve chì si strughje ind’è l’Alpe, scopre oghje e salme di i migranti morti pruvèndusi à francà a fruntiera… Ghjente umanista si custituìscenu in associu è cèrcanu à truvali un nome, per dalli una sepultura umana. «A fruntiera hà tombu, ciao Blessing» dice un tag à a fruntiera taliana. Un scrivaccuilime nant’à un muru per rende umagiu à ssa dunnuccia d’una trentina d’anni, vista viva per l’ùltima volta ind’è a notte di u 7 di maghju. Vulendu scappà à i gendarmi, a corciarella hè cascata in a Durance. U 25 di maghju, sempre à a fruntiera parte taliana, à cantu à u paese di Bardonecchia nant’à a strada di a bocca di l’Echelle, s’hè trovu dinù una salma, acciattata in una cavità in petra, ghjunta per ella sepultura. Mortu di freddu? di fatica? di fame?, l’omu ùn hà lasciatu chè pelle è ossi è qualchi panni strappati. Chì serà a so stòria? Dopu à avè francatu u disertu, pò u Meditterràniu, si serà dettu, per dassi curagiu, «alè, basta à francà ssa bocca, è ci simu!»
Quantu suffrenza è sulitùdina, quantu addisperu è turmenti averanu empiutu e so ùltime stonde di vita? Nisun mezu d’identificazione per tuccà una famiglia è pruvà di mette un nome nant’à ssa sciagura. Parte francese, sò dui altri morti chì sò stati trovi ssu mese di maghju. Un senegalese chjamatu Mamadou Alpha Diallo, è a Nigeriana Blessing Matthew, vìttime tremindui di u disprezzu d’un Cuntinente chì conta 740* millioni d’abitenti ma ch’ùn hà trovu una piazza à sti curciarelli da permètteli di custruìscesi una vita ind’è e nostre demucrazìe. Mamadou avìa 20 anni è sunniava à a Spagna. A so salma hè stata trova u 19 di maghju nant’à a strada di Briançon. U s’amicu chì l’accumpagnava era ghjuntu sin’à l’Agrottu Sulidariu di l’associu ch’aiuta ssi migranti à a fruntiera, sguardu persu è scunvoltu… «a fruntiera tomba in silenziu» dice u Monde.fr. U Cullettivu di l’Agrottu Sulidariu si lagna di e pulìtiche migratorie di l’Auropa è prova à aiutà sta ghjentarella. Dapoi un annu, u passagiu di l’alte Alpe per francà a fruntiera taliana hè di più in più adupratu. Ghjùnghjenu d’Àfrica di l’Ueste, Guinée, Côte d’Ivoire, Mali, Senegal, Cameroun… sbarchendu in Italia, pròvanu à guadagnà a Francia è cuntinuà u so viaghju versu l’Inghilterra, l’Allemagna o a Spagna… Dapoi u mese di lugliu scorsu sò cusì 3.600 migranti chì sò passati ind’è l’Agrottu Sulidariu. « Prutege e vite micca e fruntiere » dice u Cullettivu.
Dapoi chì u mondu hè mondu, l’omu hà sempre migratu. Nunda ùn pò impedìscelu di cuntinuà à migrà, hè cusì, hè a stòria di l’Umanità ch’hà fattu chì a razza umana hà pussutu spàrghjesi in tutti i lochi di a pianetta. Purghjendu scambiu è culture, anu cuntribuitu à custruisce e nostre sucetà, à le volte, si sò piantati per spusà u s’avvene, à le volte anu cuntinuatu u so caminu. Ùn pòrghjeli aiutu hè un crìmine contr’à l’Umanità.
* 512 ind’è l’Unione Aurupea
Fabiana Giovannini.