Sta dumenicata 9 di dicembre era a Ghjurnata internaziunale di lotta contr’à a corruzzione.
U gruppu Verts/ALE à u parlamentu aurupeu hà publicatu un raportu ch’evalueghja ciò ch’ella costa per ogni paese aurupeu. Un sciffru basta à rèndesi contu di u fenòmenu : sè u tutale di sta froda era distribuitu à i citatini aurupeani, ugnunu riceverebbe un mèdiu di 1772 auri ogni annu !!!
Sò 904 milliardi d’àuri chì sò ingulliti ogni annu in Auropa per vìa di sti manghjasoldi ! Vale à dì, omu pò mette fine à a fame in u mondu, strughje u paludìsimu, mette in ballu un educazione è un accessu à a salute in 46 paesi in attesa di sviluppu, guarantisce à tutti l’accessu à l’acqua beièvule è à l’eletricità, è ancu, fermerebbe sempre 360 milliardi d’àuri da spende in più ! Eccu ciò ch’ellu dice u gruppu Verts/ALE. Ssu gruppu adunisce l’aurudeputati eculugisti di tutti i paesi d’Auropa, è quelli di l’Alleanza Lìbera Aurupea ch’adunisce 45 partiti naziunalisti, autunumisti o indipendentisti in Auropa, frà i quali Femu a Corsica è u PNC. L’ALE hè stata creata in l’annati 80 in Bastia, cù i fratelli Simeoni, Màssimu è Edimondu, è uni pochi d’aurudeputati Fiamenghi, Scuzzesi, Sardi, Gallesi, Galiziani à l’èpica. Quandu Màssimu Simeoni (in 1989) è Francescu Alfonsi (in 2014) sò stati eletti deputati à u parlamentu aurupeu, èranu deputati di l’ALE, è Francescu Alfonsi hà presidatu sin’à avà u partitu ALE. A pròssima assemblea generale si tenerà di marzu 2019 in Brussella. In pienu cumbugliu di e « camisgette gialle», in Francia, ma dinù in Bèlgica, u gruppu Verts/ALE hà lampatu dunque una chjama per luttà contr’à a curruzzione chì s’arruba centinaie di milliardi d’àuri nant’à u bugettu aurupeanu. Chjama à rinfurzà l’OLAF, ch’hè l’urganìsimu aurupeu di lotta contr’à a curruzzione, à prutege i lanciatori d’alerta, i ghjurnalisti, l’ONG, à fà cresce a trasparenza è i cuntrolli nant’à a manera di spende i soldi aurupei. « In piena crisa di e “camisgette gialle” è di u troppu stroppia per quelle è quelli ch’ùn ghjùnghjenu à a fin’di u mese, sapè ch’ellu ci hè 120 milliardi d’àuri chì smarìscenu ogni annu in Francia, deve interpellà a classa pulìtica francese » dice Eva Joly chì dinunzia dapoi un pezzu ssu fenòmenu in Francia. «A curruzzione in Francia raprisenta u bugettu cunsacratu à l’Educazione naziunale o a metà di u bugettu di a salute. Quand’omu cunnosce ssi sciffri, ùn fà nunda hè indegnu ! » dice torna l’anziana ghjùdice ch’hà fattu di a so vita pulìtica una lotta contr’à ssa calamità.
U gruppu dinunzia cusì u discreditu di l’Istituzioni aurupee. Luttà contr’à a curruzzione ghjè luttà pè a demucrazìa, contr’à a miseria suciale è ghjè truvà mezi per dà di pettu à u riscaldimentu climàticu !
Fabiana Giovannini.