Hà dettu Laurent Marcangeli, candidatu à l’elezzione territuriale à prupòsitu di e rumènzule : « A pulìtica pruposta da l’Esecutivu hè un sonniu. Ùn ci ghjunghjeremu à a scela selettiva, è tuttu u mondu a dice indifora di l’associi chì travàglianu cù Gilles Simeoni. Ùn si pò avè una visione uniforma… a Corsica sò parechji territorii sfarenti. Di sicuru ch’ellu si pò fà più facilmente a scelta selettiva ind’una cumuna di 50 abitanti piuttostu chè ind’una cumuna di 70.000 abitanti. Di sicuru ch’ellu si pò fà sta scelta di manera più efficace ind’una cumuna cù alloghji individuali piuttostu chè ind’una cumuna induve a maghjurità di l’alloghji sò cullettivi »… Laurent Marcangeli si sbaglia, o sbaglia a ghjente. A scelta selettiva hè più fàciule à fà ind’è l’alloghji cullettivi, per via di una raccolta più sèmplice, più glubale, menu cara à l’abitante. Tuttu hè quistione d’urganisazione. Una cumuna di 70.000 abitanti ghjunghjerà à pacà di menu per vìa di ss’urganisazione bè fatta. Per quessa ch’ellu ci vole à aiutà di più e pìccule cumune. Ci sò cità, è ancu paesi, di millioni d’abitanti chì sò ghjunti à a scelta selettiva unicamente cù ss’urganisazione è ssa vuluntà pulìtica. Di sicuru, vuluntà pulìtica ùn ci n’hè in Aiacciu per avà… A cità di San Francisco conta 860.000 abitanti, più di 80 % di scelta selettiva è un scopu di 100 % da quì à pocu. Cumu ? Più si sceglie, menu si paca. È quelli ch’ùn scèglienu pàcanu ancu amende ! Quessa ghjè solu pè i più pultroni, chì vènenu in fine di parcorsu. Une poche di misure sò messe in ballu di nanzu da sensibilizà a ghjente, fà ch’elli mèttinu manu in pasta, furmali, aiutali à fà a scelta selettiva è falli guadagnà soldi in a so gestione cutidiane di i so lozzi. Puru, 860.000 abitanti, ùn sò 70.000 !… Sentu già dì u sgiò merre d’Aiacciu… Di sicuru, ghjè in Amèrica, quì simu in Auropa… Ljubljana, in Sluvenìa hè a capitale d’Auropa a più perfurmante. Più di 60 % di scelta selettiva cù menu di 110 chilò di lozzi chì fèrmanu à l’annu per abitante. U scopu hè u zeru frazu, sperendu tuccà 78 % è 60 chilò di residuale da quì à 5 anni ! Puru, Ljubljana conta 279.631 abitanti ! Mà… sentu già dì u sgiò merre d’Aiacciu… Di sicuru, ùn sò micca mediterrànii, ùn hè micca listessa… Parlemu dunque di i nostri vicini cucini. Parma, 194.417 abitanti, hè a cità a più pruduttrice di lozzi in Italia ! In 2013, un prugettu d’incineratore face paura à a pupulazione, un novu merre hè elettu è mette in ballu a strategìa « Zeru frazu », raccolta à u porta à porta, scelta selettiva di i lozzi fermentèvuli, prezzi incitativi, calata di l’impòsiti per quelli chì fàcenu u compost ind’è elli eccèttera, eccèttera… A scelta selettiva hè cresciuta da 49 % à 76 % in 5 anni è i lozzi residuali anu calatu di 248 chilò per abitante à 110 ! Umbeeeeh !!!… Sentu già dì u sgiò merre d’Aiacciu… Di sicuru, ùn si pò micca parangunà cù noi, aiò !… ùn simu micca in Francia (oups !) Parlemu dunque di a Francia… Besançon, cità di 116.676 abitanti. Impenserita di a salute di a ghjente, a cumuna decide d’ùn rinuvelà u so incineratore è li tocca à truvà una suluzione alternativa. Mette in ballu una pulìtica per riduce a pruduzzione di lozzi, sviluppa u cumpost di prussimità, fendu calà e tasse, è uni pochi d’altre misure di riutilisazione di prudutti. Risultatu, da 217 chilò à l’annu di lozzu residuale per abitante è 38 % di scelta selettiva, a cumuna passa à 150 chilò di lozzu residuale per abitante è 58 % di scelta selettiva ! Chjìbba ! È puderìamu parlà di Roubaix, Strasbourg è une poche d’altre cità chì adòpranu u « zeru frazu »… in Francia ! Quantu sarèbbenu cuntente sse cità di pudè cuntà nant’à una Cullettività cum’è a Cullettività di Corsica cù un pianu offensivu di ridduzzione di i lozzi è un aiutu fermu à e cumune vuluntarie… mà, di sicuru, micca Aiacciu !