Corsica Diaspora hè un associu chì cerca à mette in ballu l’azzione di a Diaspora corsa. Tenìa a so assemblea generale in Corti stu sàbatu 7 di lugliu.
Si conta un millione di Corsi spapersi in u mondu. Sò centinaie di millaie à vulè porghje a manu à l’ìsula. Corsica Diaspora hè l’urdignu chì mancava per urganizali.
St’assemblea generale hà fattu valè a strategìa di l’associu in cinque puntelli. Appughjèndusi nant’à a l’Annuariu di i Corsi di u Mondu, u primu scopu hè a so messa in lìnea da permette di cuntabilizà megliu a diaspora, sin’à avà piatta è scunnisciuta, allusinghèndula. L’annuariu adunisce tutti i Corsi chì càmpanu quì o mare in dà. Un immensa reta suciale chì ci apre à tutta sta ghjente spapersa in u mondu. U fattu ch’ellu sìa messu in lìnea ss’annuariu permette d’attivà è d’accuncià a messa in cuntattu.
Creatu in 2011 da l’impresa CampusPlex, conta oghje quasi 3500 scritti in 809 cità è 97 paesi. U secondu scopu hè di rinfurzà in ogni locu di u mondu, a rilazione trà l’Amichèvule è l’associi. Sò a lea di prussimità cù i Corsi alluntanati è un mezu ancu elli di pudè tuccali più facilmente.
Fàcenu un travaglione per mantene ssi cuntatti trà i Corsi da ch’elli ùn pèrdinu a filetta. U travagliu in cumunu di tutti ss’associi, facilitatu da l’Annuariu, serà mezu per Corsica Diaspora di sparghje di manera ancu più forte è efficace a so azzione. Terzu puntellu, cunduce una riflessione nant’à a raprisentatività di a Diaspora ind’è l’istituzioni corse. Da pocu, Corsica Diaspora hè raprisentata à u senu di u Cumitatu Ecunòmicu Suciale è Ambientale di a Cullettività di Corsica, cù Ghjuvani Dal Colletto, presidente di a Federazione di i Corsi di Marseglia. S’occupa cusì di a presidenza di a Cummissione Auropa, Rilazione internaziunale, Mediterràniu per tutti ssi Corsi à spalluzzera.
Corsica Diaspora vole riflette nant’à i criterii di raprisentatività di i Corsi à l’infora. Urganizendu riunioni pùbliche cù elli, vole custruisce pruposte è fà sorge l’edee è e cunnessioni cù a Corsica. Per ghjùnghjeci Corsica Diaspora hà da travaglià dinù à migliurà a so pròpia urganisazione da ch’ella sìa più efficace è ch’ella splendi da u rinommu di i Corsi spatriati. Infine l’ùltimu scopu hè di sviluppà a visibilità di l’azzioni di Corsica Diaspora nant’à u Net. Blog, rete suciale cù Facebook o Twitter, Corsica Diaspora hè attiva nant’à u Web. U gruppu «1 millione di Corsi aduniti », nant’à Facebook hà un bellu successu. Petru Pàulu Gori hè ciò ch’omu chjama un Community Manager. Hè in càrica di sviluppà ss’azzioni nant’à u net. «Face una quindecina d’anni chì travagliemu assai, ma oghje hè l’assemblea generale di u rinnovu, perch’è avemu cambiatu di versu, in grazia à CampusPlex, i smartfoni, l’algurìtimi, avemu per scopu di ricensà una grande parte di i Corsi di u mondu» dice Edimondu Simeoni, u fundatore di Corsica Diaspora. «Ghjente sò ghjunte da a Francia, d’Auropa, di i Stati Uniti per partecipà à ssu cullochiu. U scopu hè di pudè fà mostra di l’arnesi creati è di dibatte cumu utilizali. L’associu hè un interfaccia impurtante è attiva trà a Corsica è i Corsi spatriati è l’amichi di a Corsica, ch’elli sìanu Corsi d’urìgine o d’adduzzione. Cusì pudemu sparte inseme prucedure, scambii è prugetti. È sò parechji già ssi prugetti ind’è l’ambiente, l’energìa ecc. per travaglià à l’interessu cullettivu di ssu paese». Ventu in puppa!
Fabiana Giovannini.