Vergogna ! Vergogna pè a Spagna ! Vergogna per l’Auropa ! Più di 99 anni di cundanne à ghjente ch’ùn anu cummessu nisun crìmine chì quellu d’avè rispettatu u so cuntrattu cù l’elettori, vale à dì urganizà un riferendum d’autodeterminazione. Sò pacifisti, sò eletti, sò vìttime di viulenze è si tròvanu elli in priggiò dapoi dui anni avà. U prucessu di Madrid hè un scàndalu di demucrazìa, parziale, inghjustu, degnu di ciò chì si passa in e dittatture. U fattu ch’ellu si passa in cor’di l’Auropa sbiguttisce è tetanizeghja à tutti. I Stati, i grandi mèdia, l’intelligentsia aurupee, anu giratu u capu sinamente avà, scummudati, amutuliti. Ma nisun demucratu ùn pò stà mutu.13 anni contr’à Oriol Junqueras, deputatu aurupeu di l’Alleanza Lìbera Aurupea, 12 anni contr’à Raul Romeva, à l’èpica ancu ellu deputatu aurupeu di l’ALE, 12 anni torna contr’à i ministri Jordi Turull è Dolors Bassa, 11 anni contr’à a presidente di u parlamentu autònomu catalanu, Carme Forcadell, 9 anni contr’à Jordi Sanchez è Jordi Cuixart, presidente d’associi, 10 anni è sei mesi contr’à i ministri Joaquim Forn è Josep Rull. Vergugnose sentenze chì mettenu in periculu a pace in Auropa. U pòpulu catalanu ùn pò accettà tamanta inghjustizia ! À a chjama di i Cumitati di difesa di a Repùblica è di u gruppu Tsunami Demucratic, manifestazioni maiò s’urganizèghjanu in tutti i lochi di a Catalogna, Barcelona, Gerona, Lleida, Tarragone, Manrese… Strade, treni, aviò, imprese sò blucati… U presidente di a Generalitat di Catalunya hà dinunziatu sse sentenze cum’è «inghjuste è antidemucràtiche, scritte in un prucessu pulìticu contr’à u drittu à l’autodeterminazione ». «A demucrazìa di u Statu spagnolu hè morte. A Repùblica di Catalunya hè irreversìbile.
Persisteremu è vinceremu » hà dettu u partitu d’Oriol Junqueras Esquerra Republicana di Catalunya, membre di l’ALE. «‘Ssu prucessu ùn dà micca e guaranzìe necessarie à un prucessu ghjustu » secondu à a Federazione Internaziunale di i Diritti Umani (FIDH) ch’hà mubilizatu à u prucessu 60 osservatori ghjunti da cinque Cuntinenti. U so raportu hè gattivu contr’à Madrid : micca dibàttitu cuntradittoriu, pèssime cundizioni d’audizione di i testimogni avviziendu a verità, prucedure è istruzzione alterate, interrugatorii parziali, argumenti è ragiunamenti furbi, prisentazione bugiarde è calunniose, prove à scàrica prisentate di manera tardiva per impedìscele di pisà, presa in contu di l’avisu d’un partitu pulìticu di strema dritta ch’ùn hà nunda à chì vede cù u prucessu, eccèttera, eccèttera… A FIDH face valè un prucessu micca cunformu à u drittu è à a ghjustizia.
«Sta cundanna avvicina di più in più a Spagna di a Turchìa. Demucrati sò ghjittati in prigiò, d’altri sò minacciati. In quant’à noi assistimu à una negazione di a demucrazìa, un paese di l’Unione Aurupea hè in traccia di cundannà ghjente pè e so edee pulìtiche, per avè manifestatu demucraticamente a so brama d’esse è permessu à i Catalani di vutà. Ùn pudemu micca accettà sse pràtiche è ssa pulìtica di a vindetta » hà dettu Jordi Vera, presidente di u Partitu di a Catalogna nordu, Iè à u Paese Catalanu.
Ciò chì si passa in Catalogna hè un perìculu pè a demucrazìa in Auropa sana. Sulidarità cù a Catalogna !
Fabiana Giovannini.