Accapu di a redazione

Donna, vita, libertà !

Yalda Aghafazli avìa 19 anni. S’hè tomba dopu à esse stata torturata durante 12 ghjorni in prigiò per avè manifestatu pè a libertà di a donna in Iranu. Face dui mesi chì centinaie di millaie d’iraniani si vòltanu contr’à u so  guvernu mughjendu « Donna, vita, libertà ! » A rivolta hè nata dopu à a morte di a ghjòvana curda Mahsa Amini per vìa di qualchi capellu escendu di u velu di ssa ghjuvanotta di 22 anni… Maltrattata da a pulizza, s’hè morta in u cummissariatu. Dapoi, hè nata una rivolta ch’ùn ghjunghje à stanciassi malgratu l’assassinii è e batterchjate. Sò centinaie à esse stati assassinati sott’à i colpi di a dittattura islamista. Ma sta ripressione ùn para più a còllera di u pòpulu iranianu, è sò e donne in prima lìnea. Si càccianu u velu, ballendu in carrughju, u brùsgianu nant’à e piazze, cantendu « Bella ciao », si tàglianu i capelli mughjendu « Donna, vita, libertà ! ». È l’omi l’accumpàgnanu, manifestèghjanu cù elle, mòrenu cù elle. Sta lotta di donna s’hè mossa in lotta pupulare per dumandà a fine di u regime di i Mollah iraniani. In u mondu sanu, artiste si tàglianu anch’elle i capelli per porghje sustegnu à e donne iraniane. Yalda hè stata arrestata u 26 d’ottobre scorsu in Téhéran. Hè stata marturiata in prigiò. Liberata dopu à 12 ghjorni, dopu à una greva di a fame, ùn hè ghjunta à ripiglià forza è fiatu. S’hè tomba in casa. Hè u novu visu di a rivolta di e donne iraniane. Ùn hè a prima volta. Dapoi u 1979, ci sò state parechje mosse contr’à a dittattura islamista, affucate ogni volta da a repressione. Oghje, a còllera di ssu pòpulu curagiosu si nutrisce da sse prime rivole è si face più matura è affirmata. « Sta volta ùn dumandemu micca di più libertà, dice Ladan Boroumand chì hà fundatu un associu à a memoria di tutte e vìttime di l’islamìsimu iranianu, pigliemu da per noi a libertà di caccià u hidjab ! Vulemu a fine di a repùblica islamista. » Era l’invitata di a ràdiu France Inter u 14 di nuvembre scorsu cù trè altre donne iraniane. Arritti ingagia i so lettori à stà à sente s’intervista*.

À pàrtesi di 7 anni, e zitelette ùn anu micca u drittu d’andà à scola senza u velu. Parechji lochi sò interdetti à e donne. « Avemu u drittu à a libertà. Avemu u drittu à un paese làicu, demucraticu » dice Masih Alinejad, militente feminista ch’hà lanciatu una campagna contr’à u velu in Iranu ott’anni fà. Arrestatu cinque volta, Shima Babaei, 23 anni, conta anch’ella a so stòria. U so babbu hè smaritu, è ùn sà micca induv’ellu hè. Ella hè fughjita in Belgica. « A nova generazione sà ciò ch’ella vole, chjama à a libertà è ùn cappierà micca. Hè per quessa chì l’assassinii cuntinueghjanu oghje. Ma ùn pianteremu micca » dice a ghjuvanotta. Roya Piraie s’hè tagliatu i capelli di pettu à a tomba di a so mamma assassinata u 20 di sittembre 2022, in una manifestazione pacìfica di pruttestazione contr’à a morte di Masha Amini. Avìa 167 palle in colpu, tiratu ind’u spinu. Roya prova à spiecà u so gestu di taglià i so capelli : « era a mo còllera, era u mo dulore » dice a ghjuvanotta di 25 anni. « Ùn vulteremu più à sse tenebre, ci avemu da bàttesi sin’à a vittoria. »

Ùn ci scurdemu di sse donne curagiose chì danu di pettu à a dittattura islamista. Rispettu è sulidarità. •

Fabiana Giovannini.

* https://bit.ly/3tR00H1