Donne

U drama di l’assassìniu di Julie Douib hà messu torna l’accentu nant’à a sorte di e donne in Francia, è in u mondu. Una donna more sott’à i colpi d’un omu tutti i trè ghjorni in Francia.

Tutte e 7 minute, un antra hè viulentata. 130 sò morte in u 2018, è 31 digià dapoi u principiu di u 2019. 70% di e donne in u mondu sò o sò state vìttime di viulenze fìsiche o sessuale. Ma ùn si pianta quì u stumacheghju di a so sorte dunnina.

Certe culture sò una tortura pè e donne.

L’eccizione, mutilazione genitale à nome di a religione o di a cultura di certi paesi, i matrimonii di e zitelluccie, o quelli accunciati, a prostituzione, l’ubligazione pè e donne viulentate di spusà u so furzatore, l’ubligazione d’esse « verificata » sessualmente da unu, nanzu di pudè spusà un antru, eppò torna tutte ste pràtiche culturale arcàiche, cum’è l’ubligazione pè e vèduve in certi paesi di dorme à cantu à a salma di u so sposu o di beie l’acqua cù a quale omu l’hà pulitu. A lea di tutte ste situazione cù quella di Julie Douib è di tutte e donne vìttime di viulenze ind’è noi, hè a tulleranza culpèvule di a sucetà. Secondu i studii di l’Ipsos, un omu nant’à cinque in Francia, è un omu nant’à trè in Amèrica, pènsanu chì e donne esagerèghjanu u fattu ch’elle sò state viulentate o minate. A sucetà rilativisa l’agressione, à le volte ancu culpabilizeghja a donna chì vene à lagnassi. U dùbitu, a derisione, a messa in cundizione nant’à u rìsicu corsu s’ella face un falsu testimognu, suvente a pulizza in càrica di piglià a lagnanza ùn hè abbastanza sensibilizata, pronta, o furmata per stà à sente cù a cumpassione è a presa in contu necessaria a donna chì vene à circà aiutu.

Corse-Matin di u 17 di marzu dà a parulla à una vìttima di viulenza. Conta a so suffrenza dapoi 10 anni, l’umiliazioni, a paura, e minaccie. U so parcorsu hè tremendu è cù ellu, si vede tandu e debbulezze è e mancanze di u sistema puru in càrica di prutege a vìttima. «O Madama, ùn hè pussìbule d’esse viulentata da u so maritu » hà rispostu u pulizzeru à quella corcia donna. «M’anu dettu di riflette nanzu di porghje accusazioni grave senza prove contr’à u babbu di i mo figlioli »… conta a donna chì palesa e pressioni ch’ella hà suffertu in più di e minaccie, l’inghjulie è i colpi di u so maritu. Listessa sciagura per Julie Douib disgraziosamente.

Avìa postu sette lagnanze, diretta o indiretta, chjamava aiutu, ma ùn hè micca stata intesa. Hè stata vìttima di a perversità è a viulenza d’un omu, ma dinù di a tulleranza suciale ch’esiste in l’amministrazioni è in a sucetà quand’ellu s’agisce di i raporti d’un coppiu. È quand’ellu accade a disgrazia, a sucetà torna, parla d’un « drama cunghjucale », invece di dinunzià u crìmine.

Fabiana Giovannini.

1 Trackback / Pingback

  1. Stampa Corsa, informations corses – Donne

Les commentaires sont fermés.