À chì ghjove una Ghjurnata di a donna tutti l’anni, s’omu ùn hè capace à sente e so suffrenze u restu di l’annata ? À chì ghjòvanu belli discorsi è resoluzioni, s’ellu cuntinueghja ssu scàndalu di e donne marturiate ? U guvernu di u secondu mandatu presidenziale d’Emmanuele Macron ùn s’era ancu adunitu pè a prima volta, chì digià s’imparava ch’unu di i so ministri era inditatu da lagnanze di duie donne chì si dìcenu viulentate…
A zerga di l’associ di difesa di e donne ùn era ancu calmata per vìa di a cunfirmazione à u guvernu di u ministru di l’internu, dinù inditatu da lagnanze di donne, chì u novu guvernu era taccatu da un antra « affare » di stessu puzzichime… Ùn s’agisce micca quì di ghjudicà à a piazza di a ghjustizia, è di cummentà aldilà nant’à ciò chì si passa à u guvernu, vulemu solu fà rimarcà quant’ellu hè inchietante di custatà u nùmaru è l’ampiezza di ste lagnanze di donne marturiate. Puru si sà quant’elle ùn ghjùnghjenu à francà ssu passu di parlà è dinunzià… Quantu serìanu in vera s’elle ci ghjunghjìanu ? Ci hè troppu troppu affaraccie chì sòrtenu in u mondu di a cultura, di u sinemà, di u sport, di a stampa, di a pulìtica, per ùn esse impenseriti è stumacati di a dimenzione tremenda di ssu prublema. I muvimenti #MeToo in u mondu, pò #BeBrave in 2017 in Amèrica o #BalanceTonPorc in Francia in u 2017, anu permessu di dà curagiu à sse donne chì sinamente à avà si tenìanu piatta a so vergogna è a so suffrenza di pettu à viulenze sessuale o fastidiu. I retali suciali dinù anu aiutatu à liberà a parulla. Dapoi, sò decine di millaie di testimugnanze, millioni à traversu u mondu, chì si sò fattu sente. Dinù #Iwas o #IwasCorsica pè e zitellette o ghjuvanotte vìttime d’incestu o viulentate in a so zitellina da parenti o amichi vicinu vicinu.
Secondu un studiu in Francia, 16 % di e donne, è 5 % di l’omi dìcenu esse vìttime di raporti sessuali furzati o tentativa, in a so vita. Hè spaventosa ssa statìstica ! 50 % frà quessi sò stati vìttime nanzu à l’età di 10 anni. Nisun paese ùn hè risparmiatu. Nisun duminiu. Ghjè cum’è s’ella era una pràtica currente, cum’è s’ella era nurmale, cum’è in u mondu di a religione induve durante anni è anni, nanzu à pudè dà di più ribombu à e vìttime, sò preti ch’anu abusatu sessualmente di i cinnini ch’elli avìanu in càrica d’accumpagnà in a religione… Ogni ghjornu i testimogni di sse donne (o omi à le volte) vìttime da viulenze sessuale s’aghjùstanu à l’altri testimogni è l’ampiezza di u fenòmenu hè abbacciacante. E lagnanze contr’à l’abusi sessuali crèscenu, u so nùmaru tremendu face chì certi si dumàndanu s’ella hè vera. Ci vole di più chì artìculi di stampa oppuru lagnanze di pettu à a ghjustizia. Hè cum’è un iceberg, ciò ch’ùn si vede (ciò ch’ùn si dice) hè più tremendu è stumachente chì ciò chì s’impara… dìcenu e statìstiche chì solu 10 % di e vìttime pòrghjenu lagnanza. Ci vole à falla finita cù ss’abusi sessuali chì tradùcenu un impunità insuppurtèvule. •