È l’Auropa à mezu à tuttu stu parapiglia è tene ?? Durante à a campagna, si n’hè parlatu pocu è micca. Si sò fattu a guerra trà u guvernu è u RN sin’à quellu duellu perniziosu trà Bardella è Attal. Partitoni, media, istituti di sundaggi, anu fattu tuttu per sguassà l’edee aurupee è tutte l’altre candidature, mandendu scopi è inghjochi aurupei à e rumènzule per pudè disciulà l’uni nant’à l’altri è viciversa, sbagliendu l’elettori imbafachjulati da e bucìe di u so chjamu è risponde francufrancese.
Tutti ci simu fattu addurmintà… senza reazzioni, avemu lasciatu fà, spettatori imputenti o, peghju, indiferenti ! Pochi sò, ci vole à dilla, quelli chì si sò impegnati per circà di cunvince nant’à l’impurtanza di l’Auropa, per fà campagna, o sempliciamente per dà cunsigna di votu. Senza chjamà à vutà un tale o un tale, nò, omancu per dì ùn vi lasciate micca imprigiunà ind’è u falsu duellu trà a macrunìa è u RN ! Vutate per prugetti aurupei, fate e vostre scelte ind’è ciò ch’ella porghje l’Auropa in u cutidianu di a sucietà, a pace, u sviluppu, a sulidarità, a cuesione suciale, a difesa di e lingue è culture minurizate, a difesa di i pòpuli opprimati, a difesa di e donne, di i zitelli, di a ghjente marturiate o disprezzate… L’infrastrutture ch’ùn si puderìanu fà senza ella, e suvvenzioni di mondu prugetti, u sviluppu regiunale, a salute, l’aiutu à a pesca, à l’agricultura, à i trasporti, à a giuventù… eccèttera, eccèttera…
S’aspettava prese di parolla, voce à prò di l’Auropa o per migliurala… invece nò. Solu u chjami è risponde trà l’anti-Auropa è quella chì bramemu di cambià, una sola priurità : u dibàttitu francufrancese ! Umbeh…
Allora l’elettori anu parlatu… è oghje, si cuntinueghja : l’Auropa ?? Innò, solu, sempre, u dibàttitu francufrancese ! L’affari ùn si pàssanu in Brussella ma in Parigi ! Bardella ci hà messu i pedi pocu è micca à u Parlamentu à longu à a so prima mandatura è ùn ci vulterà mancu un pede sè u so culpacciu viaghja bè, postu ch’ellu hà in mira Matignon !!! Eccu ciò ch’ella era ricercata dapoi u principiu ! Matignon ! L’Auropa ? Un marchjapedi ! Un ingannu ! Si n’impìppenu ! Cum’elli s’impìppanu di e nostre regioni è di e so brame d’avvene !
À què, u terramotu di Macron risponde « chiche ? »
Ah vulete di u RN ? Eh ben tè, sciaccàtevi què !
O sia si pìglianu di paura l’elettori… perchè mandà à caternu l’Auropa va bè, ma mandà à caternu e so vite, u so cutidianu, forse ch’elli ci rifletteranu duie volte, nò ?
O sia vòtanu à e legislative cum’è per l’aurupeane, è tandu Macron si pruverà à a cuabitazione, cù u RN o cù un guvernu di salutu pùblicu da bluccalu…
È l’Auropa à mezu à tuttu ssu parapiglia è tene ? Si ne riparlerà da quì à cinque anni. Pè e pròssime elezzioni aurupee ! •