L’8 di marzu hà u mèritu di rimette un pocu di fiara nant’à a donna è a so sorte chì ferma ingrata. U casu dinù di ramintà l’avvanzate, e prudezze dunnine, e so brame, e so lotte, u maravigliu ch’elle pòrghjenu à a diversità di u mondu. Sistematicamente in Corsica ci piacimu à ramentà chè u nostru pòpulu hà supranatu u pòpulu francese nant’à stu puntellu. E donne francese ùn anu pussutu vutà chè in u 1945 allora chè in Corsica, Pasquale Paoli permettìa à e donne corse capu di famiglia – vèduve o micca maritate – u drittu di partecipà à e Cunsulte per elegge i rispunsèvuli di a ghjòvana nazione corsa. È forse s’ellu avìa avutu di più tempu… U fattu si stà chì à longu à 14 anni, a Corsica, in cor’di u diciottèsimu sèculu, hà ricunnisciutu a donna cum’è citatina cù diritti pieni.
È oghje, à chì ne simu in Corsica ? Esse donna ferma diffìciule. Esiste una Cunsigliere esecutiva in càrica di i diritti di e donne è di i ghjòvani, è parechji raporti è misure sò messe in ballu. Esìstenu associi di difesa di i diritti di e donne, ancu s’elli ùn sò tutt’à fattu ricunnisciuti. Esìstenu e donne in i discorsi di l’omi. Mà e tribune pulìtiche fèrmanu sempre belle maschile. E cose avvànzanu. Mà à tempu, i muvimenti cum’è #MeeToo o #MeeTooInceste si sò sparsi ancu ind’è noi è e testimugnanze sò numarose, è tremende. Puru, pochi ne pàrlanu. Qualchì tweet, qualchì articulu di stampa, si ne sò impenseriti ma… u tabù, u malasgiu, u dùbbitu, à le volte u rinnegu o u disprezzu, ùn permèttenu micca à a nostra sucetà di fà fronte. Ancu assai, omu si rivolta oghje contr’à e donne vìttime di u so maritu o u so cumpagnu, troppu numarose torna à more à calci è à pugni, ma e viulenze sessiste o sessuale, ùn sò ancu scumbattute à u livellu ch’ella abbisogna a nostra sucetà. E donne infastidite si tàcenu, vergugnose o impaurite, ma sò numarose. I # anu permessu di rèndesine contu à u livellu u più gravu di e viulenze fìsiche. Ma quantu sò à subisce viulenze murale ? Svalurizate, pigliate à a risa, sminuite, scumbattute, sò a maghjurità di e donne à cunnosce ss’offese. Pochi ne pàrlanu. Ci vole un 8 di marzu per fà risente ste situazioni cum’è anurmale. Ma ci tocca à dilla, sò pochi (è dinù poche) à sfilà in carrughju per dì innò à st’andature di disprezzu. È frà l’omi chì rèndenu umagiu, quantu sò à avè mancatu di rispettu à una donna una volta, parechje volte, suvente ? Quantu sò pronti à cambià di versu ? Quantu sò incapaci di rèndesi contu ch’elli sò sessisti anch’elli ? Quantu sò à pensà chì esse macistu « hè culturale » ? Quantu sò pronti à palisà ch’elli anu macagnatu o disprezzatu una donna perch’ella era donna ? È frà elle, quantu sò à ride cù l’omi per ùn esse disprezzate anch’elle ? Quantu sò, omi è donne, ch’ùn diceranu micca lighjendu ss’artìculu (s’elli ghjùnghjanu à lèghjelu) « pffff, n’importa chè ! »
U rispettu di a donna hà torna una longa strada à campà. Si dice ch’ellu ci volerà torna omancu dui sèculi è mezu per ghjunghje à mette à livellu di e paghe omi è donne, ancu sè e donne anu di più cumpetenze ! Chjìbba ! Allora, pensate a pena u tempu ch’ellu ci volerà per capisce ch’una donna è un omu merìtanu d’esse cunsiderati di stessa manera. Bona strada à tutte ! •