Torna una donna tumbata ssu 14 d’ottobre da una cultellata da u so cumpagnu di vita. È sta volta si passa in Corsica, in Aiacciu. Avìa 23 anni. U 5 d’ottobre scorsu, in Blois, hè una donna di 36 anni ch’hè stata strangulata da u so cumpagnu. L’8 d’ottobre, Amelie, 30 anni, hè stata strangulata anch’ella da u so cumpagnu ch’hà circatu à piattà u so crìmine per fà crede à un suicidiu. U 29 di sittembre una donna d’una quarantina d’anni hè stata tomba da u so cumpagnu chì s’hè tombu dopu, lasciendu una lèttera per dì quant’ellu era ghjelosu. Dui ghjorni nanzu, in Evry, Sabine, 43 anni hè stata tomba à cultellate sott’à l’ochji di a so figliola di 14 anni. U 22 di sittembre, in Saint-Raphaël, Edith, 60 anni hè morta strangulata. U 17 di sittembre, in Antibes, Sasia, 30 anni, hè stata ritruvata in u so rifritoghju cù u so cane, assassinata à pistullettate da u so maritu. U 10 di sittembre, in Commelle-Vernay, Elodie, 34 anni hè stata strangulata da u so maritu. I trè ciucci di u coppiu, da 6 mesi à 3 anni, èranu presenti. U 7 di sittembre, in Marseille, Charlène hè stata tomba da parechje cultellate. Sò state dinù pugnulate è ferite a mamma, Antoinette, è una di e figliole 15 anni sott’à l’ochji spaventati di i dui altri zitelli di 6 è 8 anni. U 6 di sittembre, vicinu à Besançon, Marion, 43 anni, hè stata assassinata da una fucillata da u so cumpagnu chì s’hè tombu dopu. Ghania, 50 anni, hè morta u 31 d’aostu, pigliata à cultellate da u so maritu sott’à l’ochji di i so figlioli di 9 è 19 anni è d’un antru zitellu di 5 anni ch’ella avìa sott’à a rispunsabilità. Ind’è a nuttata, à Wittenheim in Alsazia, una donna di 74 anni hè stata strangulata da u so cumpagnu. Torna u 30 d’aostu, in Bora Bora, Linda 52 anni, hè assassinata à cultellate. Dinù una donna di 52 anni in Dordogna, assassinata cù una vintina di cultellate da u so maritu. U 26 d’aostu in u Jurà, Syveline, 49 anni, hè tichjata di colpi da u so cumpagnu già cunnisciutu da a pulizza pè e so viulenze. U 21 d’aostu, in Carrières sur Seine, Clara, 19 anni, hè strangulata da l’omu ch’ella tenìa caru. U 17 d’aostu in Plédran, una donna di 86 anni hè tomba à pistullettata da u so cumpagnu chì s’hè datu a morte dopu. U 14 d’aostu, in Martinica, Marie Josèphe 54 anni hè pugnalata da u s’amicu ghjelosu. L’8 d’aostu, in Mulhouse, Sonia, 51 anni, hè stata tomba d’una fucillata. L’11, in Vélizy-Villacoublay, Magali, 42 anni hè assassinata da parechje cultellate. Dinù Rianne, 22 anni, u 10 d’aostu, in Villeneuve-sur-lot, tomba da u so maritu. U 6 d’aostu, Anne Françoise, 58 anni, hè tichjata di colpi da u so cumpagnu. U 5 d’aostu, Tricia, 30 anni, hè pugnulata in Chateaudun da u so maritu. Avìa già fattu sapè parechje volte ch’ella era vìttima di viulenza. U 3 d’aostu, Marie Lise, 64 anni, hè stata tomba da sei cultellate da u so maritu. U stessu ghjornu in Montargis, Clothilde 31 anni, in cinta di 8 mesi, hè tichjata di colpi da u so maritu. A creatura hè morta anch’ella…
Ecc… ecc… tremenda lista ch’ùn ne finisce più. •
Fabiana Giovannini.