Culore di speranza

Giallu

U culore oghjincu hè giallu. Giallu pè i curpetti in Francia… giallu dinù in Catalunya, culore di speranza, è di suffrenza. Oghje, culandi, u giallu hè difesu da Madrid chì dice ch’ellu hè segnu di sedizione… O amichi lettori, Arritti vi ne parla dapoi parechji mesi è ancu qualchi annu, a Catalogna campa mumenti diffìciuli. Brama a libertà, a ghjustizia, u drittu di scrive u s’avvene da sè stessa, sò speranze umane. Ma u guvernu di Madrid ùn oppone chè viulenza è disprezzu. Lighjite e pàgine 6 è 7 di u nostru ghjurnale.

Lighjite u testimognu di Francescu Tortos, à tempu catalanu è corsu. Si passa culandi cose d’un altru mondu. Sò incarcerati dapoi più d’un annu, ghjente ch’ùn anu fattu nisun crìmine di sangue o di viulenza.

Anu urganizatu un riferendum, cum’elli l’avìanu prumessu à u so pòpulu durante a campagna eletturale chì l’hà vistu vince l’elezzioni à puntu per sta raggione. I putachji, e bugìe, l’accuse chì u guvernu spagnolu sparghje per ghjustificà a so incarcerazione sò scàndalu d’un altru mondu. L’Auropa, u mondu, hà vistu d’induve elle vènenu e viulenze, da a pulizza spagnola, da u guvernu di Madrid, contr’à ghjente pacìfichi, zitelli, donne, omi chì vulìanu andà à vutà è chì sò stati bastunati di manera vergugnosa è velenosa. U mondu, l’Auropa, stanu muti. À nome di à no ingerenza, làcanu fà. A Francia, cusì detta paese di i diritti di l’Omu, cummenta, s’impegna, s’indegna è intarvene dapertuttu in u mondu. In Catalogna, à e so porte, in Barcelona, frà e più belle capitale aurupee, ùn move manca u ditucciu… Duie parte s’affrontanu in Spagna. Un sistema eredu di a dittatura franchista, cunnisciutu cum’un regime stremistu chì praticheghja sempre a tortura in priggiò, capace di cundannà à parechje decine d’annate d’incarcerazione u fattu di sprime un opinione, è ch’ùn hà vergogna à fà u segnu fascista in e manifestazioni di sustegnu à u putere in piazza. Di l’altra parte, un mondu pacìficu è fieru, chì rivendicheghja u drittu à l’autodeterminazione di manera serena è allegra, cù manifestazioni maiò di parechji millioni di parsoni, senza una cria di viulenza, solu u passu serenu d’un pòpulu in marchja pè u s’avvene, capace di suppurtà colpi è baterchjate, senza rèndele. Francescu Tortos conta per un dettu ssu fattu strasurdinariu di centinaie è ancu millaie di personi tutte e sere adunite à u pede di a priggiò induv’elli stanu i « presos politics » per augurali « bona notte ! ». Tutte e sere aduniti solu per dì à i so eroi ch’elli sò quì, à sparte una stondarella cù elli.

O amichi lettori, sàbatu chì vene dìmuli ancu noi chì pensemu à elli è chì i sustenimu. Venite tutti in Aiacciu, stu 9 di ferraghju davant’à a prefettura à pàrtesi di 10 ore. È fàtela sapè.

 

Fabiana Giovannini.

1 Trackback / Pingback

  1. Stampa Corsa, informations corses – Giallu

Les commentaires sont fermés.