U Cummandante Richard de Crespigny hè cunnisciutu pè u so calmu è u so curagiu in situazioni tremende. À e cummande di un A380 cù 469 passageri imbarcati, hè riesciutu à pone l’aviò cù un mutore ch’avia splusatu quand’ellu pigliava u so volu… Chjìbba ! Cù più di 40 anni di serviziu nè l’aeronòtica,
15 anni è più cum’è cummandante di bordu, 15.000 ore in volu, n’hà vistu pocu aeroporti in u mondu ! Hà vulsutu dà u so parè nu u prugettu pulèmicu di u novu aeroportu nantese di Notre-Dame des Landes… Da luntanu induve no simu noi Corsi, hè diffìciule à fassi un edea trà l’eculugisti chì chjàmanu à a priservazione di l’ambiente è l’imprese chì dìcenu ch’ellu ci vole un aeroportu più grande per via di u tràfficu aèreu in aumentazione. Tandu, avè u parè d’un cummandante d’aviò hè interessante quantunque. À prupòsitu di u perìculu di l’aviò chì pàssanu sopr’à a cità… dice u cummandante De Crespigny chì aviò ch’ùn pàssanu micca sopr’à e cità in u mondu, ùn ci n’hè! Chì ogni aeroportu hà a so particularità per l’avvicinanze di e piste, è chì quellu di Nantes ùn hè tantu speciale dà pudè esse cunsideratu cum’è «periculosu » ! Nunda à chì vede, per un dettu, cù quellu di Chambery, strintu trà duie muntagne, o quellu di Hongkong ! O, forse, quellu di Calvi, aghjusteremu noi ! In quantu à l’aumentazione di l’attività prevista in Nantes, u commandante si stona torna è parla «d’argumenti speziosi è scimàtichi ». D’apressu à ellu, Nantes ùn hè ancu à saturazione cù 3,5 millioni di passageri. Dice dinù chì, quand’ellu s’hè svegliatu u vulcanu islandese in 2013, l’attività di l’aeruportu di Nantes hè stata multiplicata da trè senza ch’ellu ci fussi u mìnimu prublema !
A maiò parte di l’aeroporti in Francia anu listessa grandezza chì quellu di Nantes è ùn sò micca à saturazione. Quellu di Genève hè cresciutu in 2014 à quasi 13 millioni di passageri senza ch’ellu ci fussi un penseru, allora ch’ellu conta una sola pista è dà di pettu à custrinte di prussimità urbana à paru à quelle di… Nantes ! «Ci vole à dì chì i Svìzzeri, in tantu chì veri demucràtichi, ùn si fàcenu micca burlà ! » dice u nostru cummandante in zerga. È ci hè megliu ! L’aeruportu di San Diego in Califurnia, conta una sola pista è una piattaforma bella più chjuca chì quella di Nantes, cù custrinte d’ambiente è interdizzione di notte… Puru, hà accoltu sin’à 18 millioni di passageri in 2014! «Cinque volte di più chì quellu di Nantes ! » Umbeh ! quessi sì chì sò argumenti ! Allora, dice u nostru cummandante, sarebbe megliu « d’evità di spende un mezu milliardu in una lamentèvule scimità pè a gloria di ss’omi pulìtichi ch’averanu smaritu ind’è l’infumichera di l’irrispunsabilità quand’omu s’avvedderà cum’ellu era stùpitu u so prugettu »…
Certi diceranu ma cosa ci entrimu noi, Corsi, cù un aeruportu in Brittagna ? U stessu ragiunamentu si pone per tutti i grandi prugetti ch’ùn ghjòvenu, à a fine, ch’hà permette à un omu pulìticu di lacà u so nome à un edifiziu pùblicu… Portu o aeruportu, nanzu di spende soldi in ssi prugetti, dunque, ci tocca à riflette è riflette bè, à e nostre priurità !
Fabiana Giovannini.