E fruntiere di a Cummissione Aurupea sò chjose omancu sin’à u 15 di ghjugnu. L’aurudeputati è a mansa di funziunarii fèrmanu cunfinati in i so territorii.
A Cummissione dice ch’ellu ci vole à mantene torna un mese e restrizzioni di circulazione. «Avemu u bisognu d’una messa in ballu prugressiva è cuurdunata » dice u cumunicatu di a Cummissione. «Ristabilisce u funziunamentu nurmale di u spaziu lìberu di circulazione Schengen serà u nostru primu scopu quandu a situazione sanitaria a permetterà. » A restrizzione per viaghjà cuncerna tutti i Stati membri di u spaziu Schengen è i Stati assuciati, vale à dì 30 paesi. Malgratu u scunfinamentu in certi paesi, i viaghji internaziunali fèrmanu sempre chjosi. « Fermeranu prubabilmente chjose e fruntiere internaziunale omancu sin’à ammaestrà a pandemìa in Auropa è i Stati Uniti » dice u Centru aurupeu Reform, specialista di e rilazioni trà l’Auropa è l’Amèrica. A Russìa hà chjosu e so fruntiere dapoi u 29 di marzu. In Francia, u ministru di l’internu hà dettu chì e fruntiere cù i paesi aurupei « fermeranu chjose fin’tantu ch’ellu ci volerà. » L’Allemagna hà chjosu anch’ella e so fruntiere dapoi u 16 di marzu. L’Àustria, u Danemark, a Spagna, a Pologna, a Repùblica Cecca, è tutti i paesi aurupei. U Reame Uniti s’hè chjosu anch’ellu. A Sluvenìa dumanda un certificatu medicale à quale vole entre in u paese. Dinù l’Ukraine. In Àfrica di u Sud hè statu dichjaratu u Statu di « catastrofa naziunale » cù l’interdizzioni di viaghju. U statu d’urgenza hè statu dichjaratu u 25 di marzu in Angola, u 28 di marzu à u Botswana, u 21 di marzu à u Burkina Faso ch’hà interdettu in più di circulà à l’internu di u paese. U Cameroun, u Cap Vert, u Congo, a Côte d’Ivoire, l’Etiopìa, u Ghana, a Guinée, u Kenya, Madagascar, u Mali, u Maroccu anu fattu listessu. U Gabon s’hè chjosu à i turisti. U Niger, u Nigeria, u Rwanda, Sao Tomé, u Sénégal, a Sierra Leone, u Togo, a Tunisìa, l’Uganda, u Zimbabwe, anu pigliatu misure. In ìndia, listessu.
Più o menu chjosi dinù u Pakistan, l’Afghanistan, l’Iran, u Canadà, i Stati Uniti, l’Argentina, u Bresil, a Culumbìa, u Chili, Cuba, u Salvador, u Guatemalà, u Venezuela, a Bulivìa, u Perou, l’Equateur, l’Australìa, a Nouvelle-Zélande, l’Egitta, Israel, u Liban, a Cisjordanìa, u Giappone, Haiti… è si pò cuntinuà cusì torna assai. U Covid19 hà toccu omancu 193 paesi in u mondu è sò tutti paesi ch’anu chjosu più o menu e so fruntiere. Fora di i persunali medicali, à le volte i diplomati, o e marcanzìe.
L’Auropa, cù 150.000 morti ferma u cuntinente u più toccu da a pandemìa. I paesi membri anu chjosu e so fruntiere dapoi un pezzu. Pròvanu timidamente certi à sorte di u cunfinamentu. Allora, da sente quì in Corsica, chì l’ìsula chì conta solu una sessantina di letti in reanimazione, duverebbe apre spalancate e so porte per vìa di e minaccie nant’à a stagione turìstica… ci hè da pienghje!
U presidente di u Cunsigliu Esecutivu Gilliu Simeoni prupone ancu assai un passaportu sanitariu, chì permetterà à a ghjente ch’ùn hè micca malata di pudè vene in Corsica.
U cusì dettu green pass hè a guaranzìa di mantene a prudenza sanitaria, à tempu à a ripresa di l’attività turìstica.
U restu ùn hè chè disciulime.
Fabiana Giovannini.