Cosa li ferma à stu bravu pòpulu iranianu s’ellu ùn hè a pruvucazione è a resistenza passiva di a no viulenza ? Ahou Daryaei hè forse a pròssima martira di u regime di i Mollah… Hè stata scuzzulata è interdetta d’entre in a so università per ùn avè purtatu u velu. Tandu, in segnu di prutestazione, s’hè cacciatu i so vestiti in pùblicu, è, meza nuda, hà aspettatu i so boi… Un azzione simbòlica per attirà l’attenzione di i mèdia è à traversu elli, quella di u mondu uccidentale da ch’ellu si movi à sustene l’Iraniani in brama di libertà.
In pocu tempu, a videò hè stata vista decine di millioni di volte in tutta a pianetta… Vale à dì chì ss’azzione ùn hè isulata, postu chì qualchisìa l’hà filmata. Hè un azzione vulsuta, di resistenza, chì si scrive in a dimarchja Donna Vita Libertà per scumbatte dapoi dui anni dopu à a morte di a giòvana curda di 22 anni, Masha Amini di sittembre 2022 in Teheran. Purtava u velu di traversu, si vedìanu un pocu i so capelli… A zitella cù a so magnìfica chjoma bruna ùn pensava mancu à male. Hè stata tichjata di colpi è resa morta à i soi…
Dapoi, a rivolta hè cuntìnua è curagiosa. Sò centinaie è ancu millaie di vìttime, donne, omi, zitelli, assassinati (quasi 600) da u regime islamistu, centinaie torna turturati, viulentati, o chjosi in prigiò, per una parulla, un sguardu, dui capelli troppu visìbuli, una sulidarità sprimata à quelli tumbati.
Ahou Daryaei s’aghjusta à a longa lista di sta pòvera ghjente marturiata. Hà 30 anni, hè maritata è hà dui figlioli. Studieghja a literatura francese à l’Università privata Azad di Teheran. Eroe pè u mondu, scema compia pè i Mollah, hè bella Ahou, cù i so capelli sciolti, i so pedi scalzi, e so gambe è e so spalle nude, u sguardu lìberu, u fronte altu… Una manera di dì, sò eiu, m’appartengu, nimu ùn hà da dimmi ciò chì vogliu esse, cumu vèstemi, cumu campà.
S’hè spugliata Ahou. Perch’è ùn hà più nunda à dà chè a so dignità di donna. Ùn hà più mezu di resiste altrimente. È aspetta. Aspetta a libertà. Aspetta di vede cambià u mondu. Aspetta di vede lìberu u so paese. O cum’ella hè stata pisìa a so sulitùdine, in ssu cortu mumentu di libertà, à mezu à e scaccanate di a ghjente à l’ingiru. U sentu da quì u so core strìnghjesi è mi stringhje ancu u meu. I vecu dinù i so ochji ritene e làcrime. Cum’ella hè bella Ahou, u capu altu nant’à ssa videò chì a stampa per l’eternità. Marchja. Marchja cù passi è veni, forte, degna, sapendu bè u martoriu chì l’aspetta. O quant’ella hè curagiosa ssa donna !
Pocu tempu dopu, s’hè affaccata una vittura à cantu à ella, parechji omi ne sò surtiti per lampalla nentru cù viulenza, insanguinala in capu. Sò i cusì detti Guardiani di a rivuluzione. Induve serà oghje sta dunnona ? Induve l’anu purtata ? Chì li anu fattu ? Si dice ch’ella hè à l’uspidale psichiàtricu… Pè a Repùblica islamica cacciassi u velu hè « un disturbu psichiàtricu esibiziunistu chì porta e donne à vulè mustrà i so capelli o a so curpuratura »… S’induvina tandu cum’ella hà da esse curata da ssa « malatìa »… A sapìa Ahou. Eppuru, s’hè spugliata è s’hè mustrata à i so boi, à u so pòpulu, à u mondu sanu. Era a so manera à ella di mughjà : Donna Vita Libertà ! •