Donne marturiate

Julie

Un umagiu hè statu resu à Julie Douib dumènica, in ss’ennèsima ghjurnata di e donne.

Èranu accolti in Lìsula a so famiglia, e s’amiche, è ghjente ghjunte da a Corsica sana per cummunià inseme di pettu à a barbaria chì l’hà tomba. Dumènica, l’8 di marzu. Cum’è l’averà campata ssa ghjurnata di e donne, Julie, da u so vivu ? Cosa averà pensatu tandu à l’èpica ? Cumu l’averà ghjudicatu ssu ghjornu ? È cumu l’appruntava dinù ? Cù speranza ? Cù tristezza ? Cù sulitùtine ? Julie Douib hè stata assassinata da u so cumpagnu di duie palle in corpu, u 3 di marzu 2019, cinque ghjornu nanzu à l’8 di marzu.

Quandu certi omi pènsanu à u rigalu o a surpresa da fà à a so cumpagna, a so moglie, a so fidenzata… quellu ch’hà tombu à Julie, ellu, cripava d’odiu è di ghjelusìa… Julie hà postu lagnanza parechje volte. Hà chersu aiutu. Hà dumandatu à i pulizzeri « aspettate ch’ellu mi tumbessi ? »… pò li hà dettu cum’un ùltima chjama à u succorsu «m’hà da tumbà »… ma nimu ùn l’hà criduta.

L’assassiniu di Julie hè ghjuntu dopu à quellu di Savannah Torrenti, u primu di maghju 2016, è quellu di Joanna Tavera, u 21 di sittembre 2010, eppò tant’altri dinù. Ogni volta, listessi testimogni, dopu l’attu criminale. «Avìa a paura »… « si sapìa ch’ellu era periculosu»… «ùn ghjornu o l’altru duvìa accade qualcosa di gravu »… Per Julie, peghju era.

Perch’è Julie avìa dettu à u sistema : «m’hà da tumbà ». È u sistema n’hà paratu nunda. Cumu sse donne ponu esse abbandunate sole di pettu à ssa minaccia permanente d’un omu chì a vede cum’a so prupietà ? E ghjurnate di e donne si seguìtanu cù mondu anàlisi è testimugnanze.

I crìmini si seguìtanu anch’elli. Malgratu l’infurmazioni, a cumunicazione, e situazioni ripetute, patimu sempre di a stessa tulleranza suciale. Ciò chì si passa trà moglie è maritu ùn sò micca i nostri affari… E donne vìttime di viulenze ùn sò micca abbastanza prutette da a sucietà. Sò mondu i tràmpali da francà per elle. A donna ùn hè micca abbastanza rassicurata da u sistema per truvà u curagiu di vultassi, di parlà, di porghje lagnanza. È dopu, quand’ella ci ghjunghje quantunque, u sistema torna ùn ci crede micca abbastanza.

Invece di mette in ballu un ambiente prutettore, à l’uspidale, in i cumissariati, à u livellu suciale, per accumpagnala cum’ellu si deve, per parà u vultà in daretu di a donna chì perde curagiu, o per impedisce l’omu à fà fronte malgratu e misure di sicurità in giru à ella, l’amministrazione vene cum’un tràmpalu di più pè a donna.

Tutti l’anni in Francia, sò decine di millaie e donne vìttime di viulenze, è una nant’à trè more sott’à i calci è i pugni di quellu ch’ella hà tenutu caru.

Ripusate in pace, donne marturiate.

Fabiana Giovannini.