Hè a stòria d’un ciucciu, truvatu qualchi ghjornu dopu à a so nàscita nant’à a rena in Djibouti. A donna pòvera ch’hà trovu è salvatu l’urfanellu ùn avìa mezu di tènelu cù ella, ch’avìa parechji cinnini. U s’hà purtatu in una casa d’adduzzione induve li anu datu u nome di Karama. Hè cresciutu senza babbu è mamma a criatura è u so sguardu dice digià tutta l’incumpreensione di stu mondu.
Puru ùn avìa mancu dui anni quand’ellu hà scontru a so mamma di core, Hinda. Hinda hè di Djibutì anch’ella, maritata à un francese, Nicolas Lagasse. Stanu tremindui in Metz è anu decisu d’adduttà un zitellu, è di falla in Djibutì per dà scenza à una criatura pòvera di truvà una casa furtunata. Dopu à parechje ricerche, u sguardu di Hinda è Nicolas trova à quellu di Karama, è si n’inamurèghjanu sùbitu. Dapoi, u s’amore ùn face chè cresce. I sposi fàcenu u passu è vene trà a Francia è Djibuti per vede u ciucciu è falli capisce ch’ellu hà una famiglia, ch’ellu ùn serà mai più solu. U 16 di nuvembre 2016, u tribunale di Djibutì accorge l’adduzzione !
Karama si chjama ormai Karama Lagasse ! Eppuru… principia u so caminu di croce amministrativu francese. Una dopu à l’altra, e so dumande di visà sò ricusate di manera cumpletamente impussìbule à capisce, cù scuse da tutte e mamme. À l’ùltima dumanda, u funziunariu ch’hà avutu u curagiu di zifrà tamanta stupidezza umana dice à Karama, dui anni è mezu : « ùn avete purtatu a prova chè v’avete abbastanza risorze per copre e vostre spese durante u vostru sughjornu in Francia ». Pàrenu fole ! Dice torna, a ghjustificazione di u ricusu : « ùn avete micca un assicuranza malatìa valèvule ». Di sicuru, u zitellu ùn hè ancu in Francia da pudè benefizià di l’assicuranza di i so parenti ! Dice torna l’amministrazione francese : « ci hè un rìsicu di sviamentu di e ragione di u vostru visà, pudete stà di manera illegale in Francia per fà malfatte ». Innò, ùn sunniate micca, s’indirìzzanu à un ciucciu di dui anni è mezu suspettatu d’appruntà forse qualchi attentatu terrurista !
Karama hà una mamma è un babbu, porta u nome di i so parenti, hà un passaportu francese à u so nome, è ùn ghjunghje à ottene un visà per sorte di Djibutì !
Hinda è Nicolas cuntinuèghjanu e so dimarchje. U 3 d’aprile 2018, l’adduzzione plenaria hè prununziata, vale à dì ùn ci hè più ritornu in daretu pussìbule, nè scuse da inventà, Karama hè soiu ! Deve pudè rientre in Francia. Eppuru, l’amministrazione dumanda torna un Exequatur, vale à dì un attu chì dice chì a decisione di u Tribunale di Djibutì possi esse esecutata in Francia.
Dopu à parechje dimarchje, i parenti ghjùnghjenu à ottene ssa dumanda è u Tribunale di Metz in Francia urduneghja à u precuratore di prisentassi pè a dumanda d’Exequatur… Chjìbba, saetta, ci ghjùnghjeranu ? Innò.
A dumanda d’Exequatur hè stata ripurtata… Hinda è Nicolas aspèttanu addisperati chì u so maschjucciu possi entre in Francia. Karama oghje hà trè anni è campa cum’un urfanellu in Djibutì. Hè un veru stumacheghju.
Fabiana Giovannini.