Ci hè un urientazione di u Padduc scunnisciutu, o scantatu : a vuluntà di ghjunghje à l’autunumìa alimentaria da quì à 20 anni.
I reddattori di u Padduc è l’eletti chì, cum’è noi naziunalisti, anu incuragitu ss’urientazione, vulìanu custruisce un agricultura di pruduzione è dunque di vicinanza, rispettosa di u nostru ambiente. In un mondu merzu da a mundialisazione è l’uniformisazione chì ci càccianu gustu è sapori, cù prudutti ghjunti da luntanu, colti acerbi, colmi di pesticidii, è carna tocca da e malatìe minacciendu i nostri bestiami, a roba nustrale piglia u valore. Ci tocca à insiste nant’à sta priurità per un ìsula è a prutezzione di e so richezze naturale. Hè per ghjunghje à ssu scopu chì ci hè vulsutu à prutege 150.000 èttari di tarre agrìcule in u Padduc. È ghjè per quessa dinù chì più si runzeca ssu putenziale agrìculu di i famosi ESA (spazii stratègichi agrìculi), più omu mette in perìculu u nostru avvene cullettivu. I nostri anziani èranu naturalmente agrueculugisti senza sapella.
È oghje, u mondu volta à l’agrueculugìa. Vale à dì una manera di pruduce chì s’appoghja nant’à l’ecusistemi, para e pressioni nant’à l’ambiente, priserve e risorze naturale. L’agrueculugìa utilizeghja a natura è e so capacità à ripiglià fiatu cum’è fattore di pruduzzione.
Detta cusì, i nostri cerbelli imprestati ponu pensà ch’omu rincula. Invece innò. Si pruduce di più è si prudùcenu prudutti di qualità cù l’agrueculugìa, si rinvivisce a natura è a biodiversità, s’arrichìscenu i paisagi cù a diversificazione di e culture. È ghjè un veru mistieru dinù. Ci vole à avè cunniscenza di i cìculi di a natura è di l’acqua, sapè i cumpunenti di a tarra, capisce u clima è esse capace d’ammaestralu. Ci vole à sapè addattà e tènniche vàrie di pruduzzione dinù, ghjòvesi per un dettu, di l’insetti è di l’animali, o d’altri vegetali per ùn avè à strughje tuttu cù i pesticidii è altri prudutti chìmichi… U Cumitatu contru a Fame è pè u Sviluppu in u mondu Tarra Sulidaria hà lanciatu un prugramma d’agrueculugìa per aiutà à luttà contr’à a fame in u mondu. Da 2018 à 2022, 29 urganisazioni paisane è cullettivi lucali saranu aiutati in 16 paesi sottusviluppati, pè u più l’Àfrica, l’Amèrica latina, l’Indunesìa, a Turchìa. Pruduce, trasfurmà, cumercializà, imparà à rege i territorii è e so risorze naturale, rinfurzà e lee suciale, à tempu travaglià à a transizione eculògica è furmà e pupulazioni. Vale à dì pòrghjeli emancipazione è benestà. Eccu tutti i vantaghji d’un agricultura rispettosa di l’ambiente. Valurizà u mondu agrìculu, cuntà nant’à u settore per dà laziu à e nove generazioni di fanne u so mistieru è di pudè campà bè. Eccu a scumessa di u Padduc.
Basta à vulella.
Fabiana Giovannini.