L’affare di Saparella ùn hà ancu finitu di fà parlà. È si sente di tuttu. Oghje u senatore Panunzi si ghjustificheghja spiechèndusi ch’ellu ùn avìa micca pensatu à male tandu, quand’ellu era andatu à vede u prefettu Bouillon per dumandali d’auturizà u permessu di custruì à Julien Peretti in 2011 per 8 case di turìsimu… À l’èpica, avìa nigatu u fattu è s’era offesu diciendu « ghjè l’onore d’un elettu lampatu à i cani ! »… Una spressione chì dice a so zerga di pettu à ciò ch’ellu fecìa passà per una bugìa… Eppuru, a stampa hà una memoria è si ponu ritruvà e dichjarazioni di tandu. Oghje l’elettu offesu ricunnosce senza vergogna ch’ellu hà l’abitùtine « dapoi 40 anni » d’andà à vede i raprisententi di u Statu per mètteli a pressione, da ch’elli còprinu l’illegalità. À l’èpica torna, u senatore pumunticu, garante di l’appiecazione di u drittu republicanu, avìa purtatu in tribunale u Levante chì avìa rimpruveratu l’intervenzione di l’elettu. In un artìculu chjaru è precisu di Corse-Matin u 18 di ferraghju scorsu à prupòsitu di e dichjarazioni di tandu messe in parangone cù e dichjarazioni d’oghje, a ghjurnalista, Laetitia Giannechini, ramenta chì u senatore avìa attaccatu in diffamazione l’associu di difesa di l’ambiente. Prucessu ch’ellu avìa persu. Aghjusta l’artìculu : « in quantu à Stéphane Bouillon, oghje sicretariu generale di a difesa è di a securità naziunale (SGDSN), ùn hà micca datu sèguita à e nostre dumande. Interrugatu in 2012 da a ghjurnalista Hélène Constanty (Razzia sur la Corsa, Fayard), l’anzianu prefettu assumava avè datu sti permessi di custruisce à i Peretti »… Permessi chì u tribunale amministrativu di Bastia in 2017 annulava cundannendu u prefettu per avè fattu « un illegalità culpèvule ». Cumu addimette ch’un elettu è un altu raprisentente di u Stau chì dèvenu guarantisce a lege, l’appièchinu à a so manera cù un disprezzu tamantu à u mondu ? Cumu accettà sta cumplicità delinquente ? Infine chì, cù st’affare ghjè u ricusu di u Padduc è di manera più generale di l’appiecazione di e lege d’urbanìsimu in Corsica, chì si pone sempre, allora chì stu documentu hè una direttiva territuriale d’accunciamentu di u territoriu. L’attitùtine di u senatore hè un scàndalu insuppurtèvule. Sarebbe ora è tempu chì tutti st’eletti chì rivendichèghjanu u stòmacu di fà n’importa cosa in Corsica, sputendu nant’à e lege, sìanu inditati è sanziunati in vera è cù elli i prefetti è i servizii di u Statu incausati. A guerra contr’à u Padduc impedisce un appiecazione serena di stu documentu indispensèvule à u sviluppu durèvule di a Corsica. Ste custruzzioni illegale, cù prese di parulle da tutte e mamme vistute di bugìe è d’inghjulie contr’à i citatini chì dinùnzianu i fatti, sò cuperte da eletti curnachjoni è ancu da naziunalisti ! À l’èpica torna, in 2012, u Levante avìa dettu « sè no simu i soli à ghjucà u rolu di veghja, risichemu d’esse pigliati in mira da i prupietàrii »… ùn pudìanu micca esse più ghjusti disgraziosamente è merìtanu a nostra sulidarità. I prupòsiti nant’à a metrupulisazione sò di stessa sterpa. Non sulatimente hè un tràmpalu à l’appiecazione d’un putere legislativu pè a Cullettività di Corsica (cumu una cumuna puderebbe supranà una regione ?), ma ghjè una minaccia chjara chì và à l’incontru di l’appiecazione di u Padduc chì cerca à scumbatte u desequillìbriu territuriale. Stumacheghju ! •