Accapu di a redazione

Lindsay

Lindsay si n’hè andata di a peghja manera chì pò esiste. S’hè datu a morta à l’età di 13 anni. « Cari parenti, sè vo lighjite sta lèttera, ghjè chì sò sicuramente partuta. Mi scusu d’avè fattu què, ma ùn ne pudìa più. Insulte, matine è sera, scherni, minaccie. Ùn ne possu più è aghju u laziu di mètteci fine… » : l’avucatu di a famiglia di Lindsay leghje, cummossu di pettu à i ghjurnalisti, l’ùltima lèttera di a zitella… A so mamma à cantu, ùn pò ritene u so dulore, e làcrime scòrrenu d’una pena infinita. Dice trà mezu à dui signozzi, « aghju pruvatu tuttu, aghju fattu tuttu, ùn simu micca stati aiutati, simu stati abandunnati cumpletamente. Nisun sustegnu, nè nanzu, nè durante, nè dopu… ùn ne possu più… mi manca tantu… » Quattru zitelle sò messe in esame oghje. Ma Lindsay hè morta. Nimu è nunda ùn a puderà fà rivene. È u so martoriu ùn hè ancu à finì. « Lindsay hè infine morta, sta putana si n’hè infine andata è anderemu à piscià nant’à a so tomba » dìcenu sempre nant’à i retali quelli chì l’anu marturiata cù e so parolle. Da induve vene tamantu odiu, tamanta inumanità ? Cumu a sucietà accumpagna a ghjuventù ? Cum’ella cerca à prevene l’irreparèvule ? Ritruvemu quì a stessa mancanza, a stessa indiferenza di pettu à e viulenze fatte à i cinnini o di e viulenze fatte à e donne…

A famiglia di Lindsay indita oghje u direttore di u liceu, l’accademìa di Lille, i pulizzeri in càrica di l’inchiesta iniziale, è Facebook è Instagram. Forse a diserzione suciale è sucietale hè a prima càusa di sti drami insuppurtèvuli ?

U sucidiu di l’aduliscenti hè in crèscita in Francia chì conta e statìstiche frà e più alte d’Auropa. Ogni annu sò circa 300 à 350 zitelli chì si tòmbanu. In 2021, u fenòmenu hè cresciutu di 22 %, spessu pè e zitelle, pè u più quelle di menu di 15 anni. Vale à dì l’addisperu è u scunsolu chì l’arruìnanu. Secondu un inchiesta di a fundazione d’imprese Ramsay Salute in 2020, dui ghjòvani nant’à trè anu già pensatu à u sucidiu, 50 % l’anu tenutu piattu. Ghjè dì quantu ssu passagiu di l’aduliscenza hè una tappa periculosa di a vita è ch’ellu ci tocca à esse attenti è à l’ascolta di sti ghjòvani, di manera cutidiana. Oghje i ghjòvani sò di più in più sposti soli à e so difficultà è u so malèssere, per vìa di i retali suciali chì mèttenu nant’à l’inghjulie un amplificazione tremende chì i più fragili ùn ghjùnghjenu à suppurtà. L’affare hè banalizatu da l’autorità pùbliche, è invece di sustene e vìttime, sò abbandunate à i so prublemi. Ma a so fragilità ùn spieca u drama. Dice solu quantu ci tocca à esse attenti à i segni di suffrenza.

Di fatti hè l’espusizione à a gattivezza a cagione tremenda di sti sucidii pè i ghjòvani. U tallozzu sculare hè indidatu per Lindsay cum’è per d’altri numarosi chì si ne sò andati nanzu à ella. Sempre secondu à st’inchiesta di u 2020, e principale càuse di sucidiu pè i ghjòvani di menu di 25 anni, sò u tallozzu sculare per 54 %, i retali suciali per 16 %, a sulitùdine per 14 %.

I ghjòvani interrugati per ss’inchiesta torna, palèsanu quant’elli si sèntenu soli è micca ascultati da i direttori d’accasamenti sculari, i prufessori, i surveglianti… è i retali suciali sò indidati cum’è i primi arnesi di quelli chì perseguìtanu i so camarati di scola.

Per disgrazia, st’inchiesta ùn hè micca stata presa à u sèriu da u guvernu. Trè anni dopu, Lindsay s’hè cacciata a vita. •

Fabiana Giovannini.