Hè viva a nostra lingua ! L’edizione di a Festa di a lingua corsa si spanna in tutta a Corsica da maghju à ghjugnu. A Cullettività di Corsica mette manu in stacca cù fede è intusiàsimu ! Una chjama à prugetti hè stata lanciata di ferraghju scorsu per sustene l’iniziative. Parechji si sò impegnati è sò 260.000 àuri di sustegnu ch’ella distribuisce a regione. «Quist’annu s’agisce di scrive issa festa à longu à dui mesi è micca solu qualchi ghjurnata. Bramemu una festa permanente, di sicuru cù mumenti forti dinù » si rallegra u presidente di l’Esecutivu Gilles Simeoni. Frà l’azzioni ambiziose di a Cullettività, u serviziu Lingua di a Cullettività hà messu in ballu un label « E Case di a lingua ». «Hè pròpiu fattu per l’attori o i gruppi d’attori chì adunìscenu i so sforzi da pudè prugrammà evenimenti o attività sani sani in immersione in lingua corsa » spieca u cunsigliere esecutivu Saveriu Luciani.
Per l’annata 2019, sò 800.000 àuri chì sò cunsacrati à l’azzioni d’immersione linguìstica, cum’è Praticalingua per un dettu, o cum’è i centri di Sàvaghju o di Bastèlica.
Cusì sò numarose l’iniziative assuciative chì vènenu à arrichisce l’azzioni stituziunali. Ugnunu pò vene à rinfurzà a dinàmica da a so pròpia manifestazione.
In Bastia, l’edizioni 2019 hè ricca d’una cinquantina d’animazioni. Principiata l’11 di maghju si compierà u 29, aghjustèndusi à u travagliu fattu à longu à l’annu in tutti i servizii di a cità.
Yoga, pastizzeria, burger quiz, vìsite, scontri, caccia à u tesoru, teatru, cantu o ballu, a municipalità bastiaccia sparghje a voglia è a gioia d’impiecà a lingua corsa in tutti i duminii, è tutti i mumenti di a vita, in casa, fora, à u travagliu, in scola… « Pè st’edizione 2019, si mette l’incalcu à nantu à e stonde à sparte in famiglia u mèrcuri è a dumenicata, da ch’elli si pòssinu sbramà i zitelli è i so genitori (o caccari) aduniti è mètteli in situazione d’amparera dolce è sdramatizata cù tante pruposte oghjinche offerte nantu à isse trè settimane ».
«A lingua corsa cum’è arnesu », eccu a scumessa pè a maghjurità bastiaccia ! «Da quì à a fine di u mese di maghju, seranu una cinquantina d’attività chì s’anu da scioglie, incù una varietà tremenda. Mùsica, sportu o spassighjate in immersione, u scopu hè di fà chì a lingua ritruvessi u so statutu d’arnesu di cummunicazione è di piantà incù l’idea d’una lingua ugettu» spieca Mattea Lacave, aghjunta à a cultura è à a lingua corsa.
«A lingua hà da esse presente in tutti i spazii di a cità » Cusì sò mubilizati 23 associi cù u scopu di tuccà tutte e generazioni, da i zitelli à i so genitori è tutta a famiglia ! Praticalingua, Fiura mossa, Scrivimu a nostra lingua è tant’altri si sò impegnati à u latu di a Merria di Bastia.
«Ci tocca à fà u sforzu à noi di parlà » dice ancu un filmettu fattu da a merrìa per inditaci a strada (www.facebook. com/ville.bastia.corsica/videos/24381020330857 37/).
« Per piacè, parlate corsu à i nostri figlioli ! Parlate corsu à i vostri figliulini ! » Venite à festighjà cù noi !
"Trasmette" // Festa di a Lingua corsa 2019 #CunTè
[#FestaDiALingua2019]Da prisentavvi st’edizione nova di a Festa di a Lingua corsa in #Bastia, vi prupunimu "Trasmette". Un filmettu chì sona cum’è un invitu, una chjama lampata à quelli chì sanu a lingua, à tramandà la à e leve nove chì l’avvene di issa lingua si ferà #CunTè !-11-29 maghju / Festa di a Lingua corsa in Bastiahttps://www.facebook.com/events/438919716912226/Publiée par Cità di Bastia sur Mardi 7 mai 2019
Fabiana Giovannini.