Pocu fà, i nostri amichi di Corse Net Infos* consacràvanu un artìculu à a viulenza fatta à i zitelli. Dicìa st’artìculu chì u serviziu di piedatrìa di l’uspidale di Bastia conta ogni mese cinque zitelli vìttime di viulenze è ch’ella hè assai penserosa a situazione in Cismonte. Ss’infurmazione hè inchietante. Francatu u secondu millenariu, e statìstiche di e viulenze fatte à i zitelli sò tremende. L’associ di a prutezzione di a zitellina dìcenu chì un zitellu more à pocu pressu tutti i cinque ghjorni in Francia, chì ottu volte nant’à dece, e viulenze fatte à i zitelli si fàcenu à u senu stessu di a so famiglia, è chì 5 à 10 % di i Francesi dìcenu ch’elli sò stati vìttimi d’un incestu quand’elli èranu chjuchi. È sò forse custati assai sottu evaluati per vìa di u silenziu di ssi zitelli è di e malfatte piatte daretu à ciò ch’omu pensa esse u calore di una casa è l’amore d’una mamma o d’un babbu… U fenòmenu nant’à i retali suciali di #metoo o #iwascorsica, e testimugnanze di sse donne è omi marturiati in a so zitellina còntanu già assai quant’ella pesa in Corsica sta realità. Trà e viulenze fìsiche, e viulenze sessuale, u tralasciu è l’abandonnu o e viulenze psiculògiche, u zitellu chì face cunfidenza à e personi maiò, perchè hè u so riferimentu è ch’ellu hè incapace di rimèttele in càusa, ùn hà mezu di difèndesi o di riagisce à u frastornu. In più di ssu trattamentu insuppurtèvule u zitellu ùn pò custruìscesi è si trova in un mancu affettivu tremendu. Ùn pò cresce nurmalamente è tutta a so vita serà ciambuttata da sse prime annate di suffrenze è martoriu. Perde a fiduccia è ancu l’imàgine pusitiva di sè stessu, à le volte ssi corci zitelli finìscenu male, trà a delinquenza, a prustituzione, a droga, l’alcolu. A maltrattanza hè difficiule à scopre è à dinunzià, à le volte i parenti ùn sò mancu cuscenti ch’elli maltràttanu i so zitelli perchè sò stati anch’elli straziati in a so zitellina è riprudùcenu ciò ch’elli anu amparatu è ch’era u so solu mudellu di una vita di famiglia.
A lege ùn risponde micca abbastanza à sse situazioni, ci volerebbe di più circundà e famiglie mà in a sucietà d’oghje induve tuttu ciò chì emana di u suciale hè di più in più ridottu, quelli chì pudìanu eri esse testimogni smarìscenu o s’addebbulìscenu. L’assistente suciale di u quartieru o di a scola, u mèdicu, l’insignante, anu un rolu impurtante per avvèdesi sè una situazione hè gattiva. Ma l’ecunumìe è e redduzzioni bugetarie ùn li permèttenu più d’esse presenti è attenti cum’elli èranu nanzu. U vicinu ùn sà cumu riagisce, hà a paura di sbagliassi, o d’avè prublemi anch’ellu. U zitellu hè u più suvente solu di pettu à a so suffrenza.
In u mondu a situazione hè ancu di più pèssima. Secondu à l’Unicef, tutte e cinque minute, un zitellu more d’un attu di viulenza. Tutte e sette minute, un aduliscente hè tombu da un attu di viulenza. 15 millioni di ghjòvani da 15 à 19 anni sò stati viulentati. A guerra, u sottusviluppu, fàcenu di i zitelli e prime vìttime di e viulenze in u mondu. Di più cuntrollu, di più ascolta, di più sustegnu… a prutezzione di a zitellina deve esse una priurità sucietale. •