Un annu fà, u 16 di sittembre 2022, Masha Jina Amini, d’urìgine curda iraniana, s’hè spenta trè ghjorni dopu à avè ricevutu colpi è batterchjate da a pulizza religiosa in Iranu. Avìa 22 anni. Sunnìava d’un mondu lìberu, bramendu di pudè fà studii per esse duttore.
Masha purtava male u so velu. Si vedìanu un pocu i so capelli. Hè ciò chì li hè statu rimpruveratu. L’iraniani, omi è donne, ùn ne ponu più di sta pulizza repressiva è intullerante. Sùbitu dopu à avè amparatu a nutizia di a morte di a ghjuvanotta, u pòpulu iranianu s’hè rivultatu. Manifestazioni si sò multiplicate. E donne, caccièndusi u velu in carrughju, brusgièndulu, taglièndusi i capelli, ballàvanu, cantàvanu, tuttu ciò chì li hè difesu… A rivolta s’hè sparsa à tuttu u paese.
Eri è oghje, u regime islamistu di i Mollah ùn hà chè una sola risposta : a ripressione. Tirendu nant’à i manifestanti, anu tumbatu donne, ma dinù zitelli è omi, arrestati, torturati, lampati in e so càrcere senza prucessi… Ma nunda ùn pianta a rivolta. Un annu dopu, si vèstenu sempre di pantalone certe donne, capelli à u ventu, capu altu è fieru, affròntanu i so boi. Oghje, cù greve da tutte e mamme, u Curdistanu iranianu hè in bullore. U guvernu hà pruvatu d’impedisce e manifestazioni, hà arrestatu u babbu di Masha ch’appruntava una cerèmonia in umagiu à a so figliola, in a so cità di Saqqez, à l’ueste di u Curdistanu. Anu imprigiunatu dinù u so zìu, pò tagliatu internet, per impedisce i manifestanti di cumunicà nant’à i retali suciali è di dassi appuntamentu. Eppuru, sò millaie di personi à èssesi adunite in giru à a so tomba, per cantà è cummemurà a zitella ch’ella era, lìbera è degna.
In un annu, in Iranu, sò parechje centinaie di donne, zitelli, omi à esse stati tombi, suvente di spinu, vìttime nucente è simbòliche d’una rivolta di curagiu. Parechje decine di millaie torna sò stati arrestati, centinaie sò stati torturati. Hè natu un muvimentu chjamatu « Donna Vita Libertà », un mughju intesu in tuttu u paese. 582 personi sò state impiccate in 2022, sìa una crèscita di 75 % di l’esecuzioni per raportu à u 2021. Frà i quali omancu 71 zitelli, secondu à l’associu Human Rights. Millaie di zitellette dinù sò state avelenate cù gasi tòssichi in e scole iraniane.
A sola risposta di i Mollah hè a viulenza di e so forze di pulizza. Ma nunda ùn face. Cuntinuèghjanu e donne à cacciassi u velu. Ghjè una manera di salutà a memoria di Masha è di tutti quelli morti sott’à e palle di un regime arcàicu è barbaru. L’autorità ùn sà più cumu fà per impedisce u nùmaru crescente di donne chì ricùsanu di piattassi i capelli. A so rivolta hà fattu nasce una rivolta più generale in Iranu è i manifestanti chjàmanu à cambia u regime accusatu micca solu di ripressione contr’à e donne, ma dinù d’affannà u pòpulu sucialmente, di pettu à a crisa ecunòmica per vìa di e sanzioni internaziunale contr’à u nucleariu iranianu. A munetta iraniana hà persu 90 % di u so valore in deci anni. L’Iranu si sfonda di più in più. Un prugettu di lege per « Sustene a cultura di u hijab è di a castità » hà da esse prisentatu sti pochi ghjorni à u parlamentu. Prevede sanzioni più forte contr’à a viulazione di a lege. Corciu pòpulu iranianu ! •