Arritti hè prufundamente adduluritu. Max Simeoni, u fundatore di u nostru settimanale, fundatore di u naziunalìsimu corsu mudernu, sustegnu di tante lotte di pòpuli è di e so necessàrie sulidarità, s’hè spentu ssu 9 di sittembre 2023.
Nanzu tuttu, era u babbu d’Albert, Julia, Ghjuvan’Carlu è l’amore di a so vita, Marie Christine, a so moglie, a so cumpagna d’ogni ghjornu. Pensemu à tutti i soi, moglia, figlioli è figliulini, nipoti è niputini, cucini, à i s’amichi afflitti, à a Corsica urfanella.
Ugnunu camperà à a so manera u dolu, è averà i so ricordi cù ellu, individuali o cullettivi. I mo sìntimi à mè si cunfòndenu. Trà l’immensa pèrdita pè a Corsica è per tutti i militenti autunumisti, l’omu ch’ellu era, u spìritu lìberu, a forza di l’analisi è l’intelligenza di e situazioni. L’impegnu accanitu tutta a so vita da ch’ellu si rispunsabiliseghji u pòpulu corsu è possi truvà cù l’unione è a demucrazìa e strade di l’avvene. A ràbbia ch’ellu ci hà messu, a passione, a determinazione, a generosità, tuttu ciò chì mancherà à a nostra ìsula è à e so lotte. Mondu volte hà impeditu catastrofe è drami ind’è u naziunalìsimu. Era una parola di pace è di custruzzione. Per Arritti hè un viotu tamantu è irrimpiazzèvule.
Di l’altra parte, aghju un antru pugnu in pettu di tuttu ciò ch’ellu m’hà purtatu à mè di più ìntimu. Aghju betu à a so surgente. Ghjè ellu cù Francescu Alfonsi ch’hà furmatu a ghjòvana militente ch’eru tandu, è mi ferma sempre in mente u nostru primu scontru quand’ellu m’hà accolta cumu sè eru una persunalità. Pò tutte l’annate scorse dopu, induv’ellu m’hà presu sott’à a so prutezzione. Max era u mo secondu babbu. Più chè a nazione, m’hà insegnatu a vita è e rilazioni umane. Cusì, era u militente accanitu chì tuttu u mondu cunnosce, ma era dinù un omu generosu, stuzzicaghjolu dinù, chì li piacìa à ride di e so passioni. Avìa daretu a so apparenza discreta, una presenza tamanta per sustèneci è truvà suluzioni à i nostri prublemi quand’ellu ci vulìa. Cuntava maravigliosamente a stòria di u nostru paese è i fatti ch’ellu avìa campatu. Quantu n’avemu fattu colli è falla in vittura à chjachjarà ore sane nant’à e riunioni è i fatti naziunalisti !
Omu di cunsiglii, circava sempre à capisce u cumu è u perchè di e situazioni da pudè megliu affruntale, è ritene ne e lezzioni. Analizava in permanenza l’andature umane, da stirpane u megliu, smuntà i mecanìsimi gattivi, insegnacci a strada bona. Era u stratege, quand’Edimondu era u carismaticu. Max hà cunseptualizatu u naziunalìsimu corsu mudernu, era impegnatu notte è ghjornu da fà ch’ellu àppia un avvene cullettivu u pòpulu corsu. L’autunumìa di sicuru – u cumbattu di a so vita – cunvintu ch’ellu era di l’interdipendenza di a Corsica in u mondu d’oghje. Ma più chè l’autunumìa, a demucrazìa. Era un omu determinatu è prontu ancu à scuzzulà u Statu francese, sin’à cundannassi à a machja. Ma u so leitmotiv hè sempre statu a demucrazìa. Sapìa chì a Corsica ùn pudìa affruntà a cinquèsima putenza mundiale, ma bellu più, sapìa ch’ùn si face un pòpulu cuscentu, arrittu è decisu, chì assucièndulu è rispunsabilizèndulu cù i principii di a demucrazìa.
Màssimu, ci avete indidatu a strada. Vulerìa tantu chì a ghjuventù sàpia ciò chè vo avete purtatu à a Corsica.
Ghjuventù, impara è bevi à a so surgente. Ghjè u caminu ch’ellu hà inditatu chì solu ci permetterà di scrive un avvene di pace è di sviluppu. È sì tù chì l’hai in manu.
Ripusate in pace, caru Màssimu. L’avete più chè meritatu. Ci avete offertu tamanta làscita. À noi di sapè tramandala. •