Mediterràniu hè in perìculu, affucatu da i lozzi di plàsticu è pè u più i microplàstichi ch’invàdinu tutti i so spàzii è minàccianu tutte e spèzie marine sin’à a salute di l’omi. Dettu dapoi sempre mare di bellezza è di purezza hè ghjuntu oghje u mare u più pulluatu di a pianetta. Rivocu di i grandi fiumi imbruttati da mulizzi da tutte e mamme, rumènzula di i cumplessi industriali chì ci spùtanu u so vòmitu, sgurgatoghju di bastimenti chì ci pullìscenu e so vasche, mare nostrum s’ingolla tutte e mullizzerìe di l’omi cù livelli di pulluzioni incredìbuli. Raprisenta 1 % di l’acque marine mundiale, puru conta 7 % di i microplàstichi. Sìa per chilòmetri quadrati, 1,25 millioni di pezzatelli di plàsticu di menu di 5 millìmetri. Vale à dì quattru volta di più chè u famosu cuntinente di plàsticu scupertu ind’è l’Atlanticu nordu ! I macroplàstichi anu aumentati anch’elli. Anu duppiatu in menu di 20 anni, vale à dì più di 200 pezzi di plàsticu per chilòmetru quadratu. L’avete forse vistu istatina andandu à piglià un bagnu ! Ùn ci hè mezu, ancu puru cù un mare lindu, d’ùn francassi à truvà pezzi di plàsticu marighjendu nant’à u mare. U plàsticu raprisenta più di 60 % di i lozzi in u Mediterràniu. 80 % vènenu da e terre o i fiumi, l’altri sò ghjittati in mare o nant’à a rena. 95 % di i lozzi nant’à a rena hè plàsticu ! Cù 60 millioni di tunnellate di plàsticu pruduttu tutti l’anni, l’Auropa hè u più grande pruduttore mundiale di plàsticu dopu à a China. Secondu à Isabelle Autissier, presidente di WWF France, « quasi tutte e spèzie marine sò tocche. Pezzi di plàsticu sò stati ritruvati in corpu di e tortughe marine è in 90 % di l’acelli marini di u mondu. Ssu plàsticu manghjatu da i pesci hè manghjatu dopu da l’omi. Manghjemu ciò ch’elli mànghjanu ! » Senza parlà di i mammiferi marini, delfini è balene chì vènenu more nant’à e sponde, carchi di plàsticu in corpu ! « Omu ùn sà cumu sbarrazzassi di ssa pulluzione sparsa à u livellu pianettariu » dice u CNRS, « i microplàstichi sò dapertuttu, ancu ind’è l’Arcticu ». Ùn hè pussìbule à stu livellu di filtrà ssa pulluzzione. A suluzione ùn pò vene chè di a pruduzzione. Ci vole à piantà cù ssa pruduzzione sfrinata di plàsticu è fà chì pianamente è bè, omu ùn sputa più in mare tutte sse mullizzerìe. In 2018, a Cummissione Aurupea hà adupratu una direttiva per riduce u lozzu ind’è l’oceani, pè u più u plàsticu. Ma s’aspetta sempre chì ssa direttiva, cù d’altre, sìppia aduprata sott’à a forma di lege da i guverni aurupei. À passucci ùn ci ghjunghjeremu. Ci vole una rivuluzione ind’è e pràtiche da pruduce menu plàsticu è ci vole cumpurtamenti più rispunsèvuli. Vale à dì ci vole una vera vulintà pulìtica.
Ne parlerà di tuttu què u G7Med ?