«Una maghjurità di Corsi s’hè sprimata sta sera per dì ch’elli ùn vulìanu più di u vechju sistema è ch’elli ci fecìanu cunfidenza per esse a forza ch’hà da purtà a Corsica chè no duvemu custruisce tutti inseme »… cusì parlava dumènica u presidente di u Cunsigliu Esecutivu, Gilliu Simeoni «A Corsica hè à un mumemtu di cincinamentu, simu in traccia di scrive una pàgina nova di a stòria di ssu paese. » Hè u primu messagiu di u scrutinu legislativu di u 18 di ghjugnu. Una pàgina chè no giremu inseme. Ùn vulemu più di a Corsica d’eri, chì manda ghjente in Parigi per cunduce a so carriera persunale è vènenu à visità a so circuscrizzione solu i ghjorni d’elezzioni. Bisognu ci hè di travaglià. I Corsi aspèttanu, è vòlenu una Corsica nova, muderna, appaciata, sparghjendu felicità à i so figlioli, è fendu di e so ràdiche u s’avvene. I naziunalisti anu mustratu ch’ella era pussìbule di porghje suluzioni.
Hè una pìccula rivuluzione à senu di a rivuluzione pulìtica tremenda chè no campemu dapoi 18 mesi.
«Avemu a fame di fà » avìa dettu eiu di dicembre 2015.
Dapoi, avemu mustratu chè no èramu capaci di cambià a sorte di u nostru pòpulu. Eccu a prima càusa di ssu ciambuttamentu demucràticu di u 18 di ghjugnu. Hà dettu torna u presidente Simeoni : «Millaie di Corsi ch’ùn spàrtenu micca tutte e nostre edee, ci anu fattu cunfidenza è anu cuntribuitu à ssa vittoria. Quessa ci impone d’esse ancu di più aperti, ancu di più à l’ascolta di a ghjente, ancu di più dispunìbuli da sparte a nostra vuluntà d’impegnà tutte e forze vive in a dinàmica. » A forza di a maghjurità si sprima in ste parulle custì di u presidente di l’Esecutivu. Sò parulle chì dìcenu quantu simu cuscenti di e nostre rispunsabilità è di e difficultà ch’elle pòrghjenu. Per quessa, dice torna Gilliu Simeoni, « Stu risultatu ci incuragisce, ci rinforza dinù, ma duvemu tènelu à mente cun umilità. Duvemu cuntinuà à travaglià è fà mostre ogni ghjornu chè no simu in una lògica d’apertura, di spartera, di difesa di l’interessu generale… Ùn hè chè cusì chè no puderemu dà di pettu à l’elezzione territuriale di dicembre 2017 cù cunfidenza. » Vale à dì… anu vintu e nostre edee, avemu dinù cunvintu di a nostra capacità di fà. Ci tocca oghje à sparghje u sìntimu naziunale, aprendu e nostre porte, accugliendu i Corsi, invitènduli à quella scumessa tamanta : fassi pòpulu ! «Ghjè un messagiu chì Parigi deve sente, dice torna Gilliu Simeoni. Dapoi ch’ellu hè statu elettu u novu presidente di a Repùblica, omu ci spieca chì a Francia deve rifurmassi prufundamente, ch’ella deve cambià u so raportu à l’istituzioni, à l’Auropa, à a memoria culuniale, à i so territorii… U Statu ancu ellu deve cambià u so raportu à a Corsica !
Deve accittà di ricunosce chjaramente chì ciò chì si passa quì ùn hè solu un prublema ecunòmicu è suciale, ma un prublema fundamentalmente pulìticu ch’ùn pò esse trattatu chè di manera pulìtica. »
O ghjente, eccu ciò chè v’avete permessu sta dumènica u 18 di ghjugnu 2017. S’apre l’avvene.
Fabiana Giovannini.