Un cunsortium di multinaziunale russiu (impresa Nordgold) è canadianu (impresa Colombus Gold) bràmanu di pudè spluttà l’oru à u senu di a furesta amazuniana di a Guiana francese. Anu chjamatu ssu prugettu, Muntagna d’oru. Torna una nutizia cumplettamente scema ! Ècculi à vulè scavà una fossa grande cum’è 32 stadii di ghjocu à pallò cum’è u Stade de France, in core di duie riserve biològiche integrale, prutette da ùn sò quantu scritti internaziunali di difesa di l’ambiente… Da pudè spluttà cusì u preziosu mettallu, anu da sradicà 1513 èttari di furesta, frà i quali 575 èttari di furesta detta primaria induve càmpanu più di 2000 spècie vegetale o animale !
Per ghjunghje à què li ci volerà à utilizà 57000 tunnellate di splusivi, 46500 tunnellate di sianuru è 195 millioni di litri di fiulu ! U scopu è di ghjunghje à spluttà 54 millioni di minerale per truvà un zinzichellu d’oru… vale à dì 1,6 grammi di mettallu per ogni tunnellata di minerale ! Vi pare nurmale à voi ?
A furesta amazuniana hè u pulmone di a pianetta. Da u nordu ueste bresilianu sin’à a Culumbia, u Perù è altri paesi d’Amèrica Latina, hè a più grande furesta trupicale di u mondu, è una magnìfica riserva di biodiversità, attraversata da millaie di fiume è fiumicelli è induv’elli càmpanu tribù d’umani cù a so cultura scarsa ch’abbisògnanu anch’elli di a furesta. Cuntene 50 à 70% di e specie animale o vegetale di a pianetta, a furesta amazuniana è quella di a Guiana francese hè una richezza impressiunante. In grazia à a varietà di u climà, sviluppeghja una grande varietà dinù d’abitati pè a biodiversità.
À tal’puntu ch’ùn hè ancu compiu l’invintariu di sse spècie animale o vegetale è chì une poche sò sempre da scopre ! Si ponu truvà cusì sin’à 150 àrburi sfarenti in un solu èttaru, vale à dì 10 volte di più ch’una furesta temperata, più d’una centinaia dinù di mammiferi, 450 spècie d’acelli, 200 spècie di rettili è anfibiani, 200 spècie di pesci, senza parlà di l’invertebrati ch’ùn sò ancu cunnisciuti cù una biumassa 10 à 20 volte più impurtente chì quella di i vertebrati. A richezza di a furesta amazuniana di Guiana conta dinù àrburi giganti, liane maiò, piante à l’infiuriscenze strasurdinàrie cum’è l’urchidee, è animali simbòlichi cum’è u jaguar, parechje spècie magnìfiche di scìmie, lontre gigante, tapiri, caimani, boà, coleotteri giganti, baravulelli di mille culori… infine chì spècie endemiche preziose ch’abbisògnanu di a prutezzione di l’omi.
Fabiana Giovannini.