Narges Mohammadi, premiu Nobele di a Pace 2023, imprigiunata in a tremenda prigiò iraniana d’Evin, hè malata di u core. U so trasferimentu à l’uspidale hè statu impeditu da i so boi per vìa ch’ella ricusa di mèttesi u velu islamistu. Dice Narges ch’ella a face « in l’onore di u sangue sparsu da e donne di u mo paese ch’anu persu a vita sott’à a ripressione di u regime misoginu religiosu, ùn fiancheraghju micca ».
Aida Rostami, 36 anni, duttore, curava à l’appiattu i manifestanti di u muvimentu Donna Vita Libertà feriti da a pulizza islamista… Hè stata assassinata u ghjornu di a so arrestazione, a so salma senza vita purtava segni di turtura…
Fatemeh Rejay i Rad, duttore, hè stata premiata da a cità di Amol, à u nordu di l’Iranu, cum’è milgiore duttore di l’annata ! Hè cullata senza velu nant’à a scena per ricuperà u so prèmiu. Qualchi ore dopu u so drittu à esercità a medicina li hè statu cacciatu da u ministeru di a salute di u regime islamistu…
Dopu à 28 ghjorni di comà, Armita Garavand, una liceana curda, hè morta. Ssa zitella di mancu 17 anni, hè stata minata perch’è ùn purtava micca u velu. I so parenti ùn sò micca stati autorizati à purtala in terra in u so paese nativu… ci sò stati l’azzuffi à u s’intaru.
Nasrin Sotoudeh, avucata, militente di i diritti umani imprigiunata in a prigiò di Ghartchak in Teheran per esse andata à l’intarru di Armiata, hè in greva di a fame è di medicamenti per dinunzià a ripressione. A so vita hè in perìculu. Ùn hè stata ghjudicata perchè hà ricusatu di purtà u velu di pettu à i so ghjùdici…
Masha Yazadani, a mamma di u ghjòvanu manifestante Mohammed Zahedi, assassinatu da u regime di i mollah, hè stata arrestata è cundannata à 13 anni di prigiò, frà i quali 5 fermi, perch’è dumandava ghjustizia pè u so figliolu. Hà dettu à i s’amichi : « ùn vi ne fate per mè. Hè una battaglia è ind’è ssa lotta, scumbatteraghju sin’à a morte, pè u mo figliolu »…
E famiglie di i manifestanti tombi da u regime islamistu per sustene u muvimentu Donna Vita Libertà, sò tutte perseguitate per fà tace a rivolta. Invece, ùn face chè cresce. L’inghjustizia è a viulenza fabricheghja sempre di più martiri. L’Iranu di i Mollah deve finisce. U pòpulu iranianu, e donne, i zitelli, l’omi, sò marturiati è affucati. L’Iranu hè dinù un perìculu per tutta a regione è si sà ch’ella cumbriculeghja contr’à Israele cù i peghji muvimenti terruristi. Hà armatu u Hamas è ferma u so peghju sustegnu.
Quantu donne, quantu zitelli, quantu corcia ghjente u mondu occidentale lascierà soffre è more di fronte à ssu regime islamistu facista iranianu ?
À Aida, li piacìa à ballà, i so capelli à u ventu… À Armita, li piacìa à fà disegni, avìa un talente scemu. Avìa dettu pocu tempu ch’ella fussi attaccata in u metrò iranianu : « Ancu a notte a più fosca finiscerà è u sole lucicherà ».
Reyhaneh Jabbari, 19 anni, hè stata cundannata à a morte è esecutata da u regime islamistu 9 anni fà perchè avìa tombu u so boiu chì a viulentava… Shole Pakravan, a so mamma, artista, chì si batta contr’à a pena di morte, hà dettu : « sì resucitata a mo ciuccia cù e zitelle è i zitelli chì dìcenu innò à stu Statu furzatore chì viulenteghja ».
Àppiimu curagiu. Arrizzèmuci ancu noi cù e donne iraniane ! •