Torna un annata à scumbatte pè a nostra lingua !
2021 hà vistu a prima rientrata di e nostre scole assuciative d’insignamentu immersivu in lingua corsa, create di ferraghju scorsu. Scole custruite è purtate da a forza militente, a vuluntà di i parenti, è e nostre brame d’avvene pè a lingua corsa, sprichju d’universalità. Cù a lege Molac, s’hè vistu chì a citatella francesa pò spaccassi, è lascià passà u sole à traversu e so crepature. Bramemu di vede i so ragi empie tuttu u nostru spàziu è schjarìsceci l’avvene ! U gruppu Libertà è Territoriu ch’elli anu cuntribuitu à creà i deputati naziunalisti corsi à u Palazzu Bourbon, hà guadantu parechji altri deputati da tutti i banchi di l’Assemblea naziunale, da a dritta à a manca, passendu pè u centru è l’eculugisti. Da tutte e regioni di Francia induv’ella prova à sopraviva una lingua chì vene da u sprufondu di a stòria di ssi territorii, purtèndusi una cultura più vechja chì a cultura francese, ci sò deputati oghje capaci di capìsceci è di sparte e nostre vuluntà. U muru giacubinu ùn sterà tantu à ròmpesi. Vulemu fà campà e nostre identità, vulemu scrìvele ind’è l’avvene. Vulemu dalli forza è rispunsabilità. Nunda ùn pò parà ssa vuluntà tramandata da sèculi ! Di sicuru, u guvernu hè putente, s’hè arrabbiatu, hà pruvatu à mette torna tràmpali è blucchime, ma a mubilisazione in giru à una sèmplice è ghjusta dumanda di drittu à campà, cresce listessu è vince sustegni novi. Vinceremu. A sapemu. 2021 a ci hà detta.
Ss’annata hà vistu dinù a nostra determinazione cresce pè i prigiuneri pulìtichi. Custì torna, mai u sustegnu pè u so vultà ùn hè statu cusì forte. Oghje, ùn sò solu i naziunalisti à vulè appiecà u drittu, in Francia, in Auropa, ùn si capisce micca è ùn s’accetta micca l’attitùdine di u guvernu. Di sicuru, hè più chjosu chè mai, ci hà messu tràmpali da tutte e mamme per impedisce u s’avvicinamentu è a so libertà. Ma ùn steranu tantu à sfundassi anch’elli. Custì dinù ci sò luciori d’avvene è sustegni novi per ottene ghjustizia. Deputati, senatori, aurudeputati da tutte e tendenze pàrlanu cù noi, per dì cum’è noi. Anu da vultà. Forse 2022 serà l’annata di u so ritornu in Corsica, è forse serà ancu quella di a so libertà. Sapemu quantu serà diffìciule à strappala, ma a fede s’hè arradicata di più, 2021 ci hà datu forze nove.
Natale hè venutu à pòrghjeci speranza. U nostru avvene ferma ind’è e nostre mani. Ci serà torna bisognu di mubilisazioni è travagliu, a sapemu, ma u tempu ghjoca per noi. Basta à avè core in fronte è strada dritta. Basta à fà cresce e sulidarità. Basta à crede ind’è e nostre capacità. Basta à cultivà fede ind’è a demucrazìa. Basta à avenne a vuluntà. A ci dicìa Edimondu ch’Arritti ramenta in i so messagi.
A ci dice à longu à i so riflessioni u nostru funditore Massimu Simeoni. A ci dice a nostra stòria sè no sapemu ritene e so lezziò. A ci dìcenu sopratuttu e nostre brame d’avvene. Bon’Natale à tutti cari amichi lettori ! •